Атырау облысы Қоғамдық кеңесінің кезекті отырысында «Азық-түлік өнімдері бағасын тұрақтандыру шаралары» тыңдалды

---

2022 жылдың  27 қазанында өткен облыстық қоғамдық кеңестің жоспарлы отырысында Атырау өңіріндегі ауыл шаруашылығында су ресурстарын тиімді пайдалану мен әлеуметтік маңызы бар азық-түлік бағасын тұрақтандыру мәселелері қаралды.

Облыстық қоғамдық кеңес төрағасы Мақсым Ізбасовтың төрағалығымен өткен кеңес отырысына облыс әкімінің орынбасары Қайрат Нұртаев, бірқатар басқарма және мекеме басшылары, кеңес мүшелері қатысты.

Күн тәртібіндегі алғашқы мәселе бойынша Атырау облыстық ауыл шаруашылығы басқармасының басшысы Салауат Өтеғұлов ауыл шаруашылығында су ресурстарын тиімді пайдалану мен су қауіпсіздігін қамтамасыз ету шаралары туралы баяндап өтті. Атырау өңіріндегі климаттық жағдайларға сәйкес егістіктер ашық су көздерінен жүргізіледі және суару–суландыру жүйелері негізінен Атырау қаласы, Индер, Исатай, Құрманғазы және Махамбет ауданы аймақтарын қамтиды.

Азық-түлік қауіпсіздігін қамтамасыз ету және әлеуметтік маңызы бар азық-түлік тауарлары бағасын тұрақтандыру шаралары туралы Атырау облысы кәсіпкерлік және туризм басқармасының басшысы Нұрбол Жаңабеков мәлімдеп, бағаны тұрақтандыру бойынша жергілікті тауар өндірушілер мен шаруа қожалық иелерімен әлеуметтік маңызы бар азық-түлік өнімдерін тұтынушыларға қолжетімді бағамен және жеткілікті мөлшерде қамтамасыз ету мақсатында  435 меморандумға отырғандығын айтып өтті.

Қоғамдық кеңес мүшелері Атырау облысындағы каналдардың жағдайы және соңғы жылдары оларға жүргізілген күрделі жөндеу жұмыстары, Жайық өзенін тереңдетіп қазуды жеделдетіп жүргізу, егін шаруашылығы саласында тамшылатып суару әдісін пайдалану, Қазақстанда өндірілген сүт өнімдерімен қамту мүмкіндігі, жалпы азық-түлік өнімдері бағасын тұрақтандыру бойынша ұсынымдарын ортаға салды.

Кеңес отырысында қаралған мәселелер бойынша кеңес мүшелерінің зерделеу қорытындысы мен ұсыныс-пікірлері ескеріліп, арнайы Қарар қабылданып, тиісті мемлекеттік мекемелерге жолданды.