Халық талабы-басты құндылық

---

Атырау облыстық Қоғамдық кеңесіне хабарласқан Индер ауданы, Есбол ауылының тұрғындары «Малым–жанымның садағасы» деп бағып отырған малдарын талаған иттерді жоюға көмек сұрады. Бүгінгі күні тұрғындар адамнан қорықпайтын, әбден қасқырланып алған иттер қай көшеден атып шығады деп, үрейленіп көшеде емін-еркін жүре алмайтынын айтады. Балаларды мектепке жіберу де қауіпті, «Меңдібай» жақтан қатынайтын балаларға тіпті қиын,-дейді ауыл тұрғындары.

«Ит–жеті қазынаның бірі» десек те, тегі жыртқыш хайуан екенін естен шығармаған жөн. Адам саулығының амандығы мен мал басының бүтіндігі үшін  Есболдықтар облыстық Қоғамдық кеңестен малға шабатын иттердің көзін жоюға ықпал етуді сұрайды.

Облыстық Қоғамдық кеңесінің мүшесі Нұрайнаш Камалова, бұдан бір жыл бұрын малды қырып, тұрғындарға шапқан иттер туралы мәселе көтерілгенін, тұрғындар шағым келтіргенін, ендігі жерде ит талаған малы үшін халық өтемақы талап ететіндерін айтады. Осы мәселе бойынша Атырау облыстық Қоғамдық Кеңестің төрағасы М.Ізбасов Индер ауданының әкімдігімен хабарласып, Есбол ауылының тұрғындарының шағымын жеткізді.

Аудан әкімі бұл жайдан хабардар екенін, Есбол ауданы бойынша 25 қойдың, Елтай ауылы бойынша 5 қойдың шығыны болғанын, бүгінгі күні иттерді аулау шаралары жасалып жатқандығын мәлім етті.

Атырау Облыстық Қоғамдық кеңесі