Новости Казкенес
Новости KazKENESҚОРДАЙ АУДАНДЫҚ ҚОҒАМДЫҚ КЕҢЕСІНДЕ ПРЕЗИДЕНТ ЖОЛДАУЫ ТАЛҚЫЛАНДЫ
Бүгін Қордай аудандық Қоғамдық кеңесінің төрағасы Нұржан Молдабековтің төрағалығымен кеңес мүшелерінің қатысуымен Қазақстан Республикасы Президентінің Қазақстан халқына Жолдауында белгіленген басым міндеттерді талқылауға арналған кезектен тыс отырыс өтті.
Отырыс барысында Мемлекет басшысының елдің әлеуметтік-экономикалық дамуын жеделдету, инфрақұрылымды жаңғырту, көлік-логистика және энергетика салаларын дамыту, ауыл шаруашылығының өнімділігін арттыру, шағын және орта бизнесті қолдау, цифрландыру мен жасанды интеллектіні енгізу, халықтың әл-ауқатын арттыру және мемлекеттік басқару жүйесінің тиімділігін жетілдіру бағытындағы міндеттері қаралды.
Атап айтқанда, Президент 2027 жылды «Жалпыхалықтық ауқымды құрылыс жылы» деп жариялауды ұсынды. Бұл бастама аясында еліміздің барлық өңірінде жолдар, әуежайлар, вокзалдар, денсаулық сақтау, спорт және мәдениет нысандарын салу мен жаңғырту көзделген.
Сонымен қатар 2027 жылғы 1 қаңтардан бастап ең төменгі жалақы мөлшерін қазіргі 85 000 теңгеден 110 000 теңгеге дейін көтеру тапсырылды. Бұл өзгеріс шамамен 1,8 миллион азаматтың табысын арттыруға ықпал етеді.
Талқылау барысында қоғамдағы татулық пен бірлікті сақтау, азаматтардың ел болашағына деген жауапкершілігін арттыру және мемлекеттік саясаттың нақты нәтижелерге бағытталуының маңыздылығы атап өтілді. Сондай-ақ Қоғамдық кеңестің қоғам мен мемлекеттік органдар арасындағы байланысты нығайтудағы, тұрғындардың ұсыныс-пікірлерін жеткізудегі және маңызды мәселелердің шешілуіне қоғамдық бақылау жүргізудегі рөліне ерекше назар аударылды.
Отырыс қорытындысында Қоғамдық кеңес мүшелері Жолдауда айқындалған міндеттердің ел дамуы үшін маңыздылығын атап өтіп, олардың өңірлік деңгейде жүзеге асырылуына қоғамдық бақылауды күшейту, азаматтық белсенділікті арттыру және жергілікті жерлердегі өзекті мәселелердің шешілуіне ықпал ету қажеттігін жеткізді.