ҚАЛАЛЫҚ ҚОҒАМДЫҚ КЕҢЕСТІҢ КЕЗЕКТІ ОТЫРЫСЫ ӨТТІ

Бүгін, 2026 жылғы 29 қазанда Қызылорда қалалық Қоғамдық кеңесінің кезекті отырысы өтті.

Жиынға Қоғамдық кеңес мүшелері, қала әкімінің орынбасары А. Нұрмағанбетов, дербес бөлімдер мен сала басшылары, бұқаралық ақпарат құралдарының өкілдері қатысты.

Отырысқа Қоғамдық кеңес төрағасы М. Кәрімбаев жетекшілік етті.

Күн тәртібінде екі маңызды мәселе қаралды:

1. Қызылорда қаласындағы қоғамдық көлік қызметінің сапасы мен қолжетімділігі, автобус паркінің жұмысы туралы.

2. Қызылорда қаласының 2026–2027 жылдардағы жылу беру маусымына дайындығы және қысқы кезеңде тұрғындарды жылумен қамтамасыз ету мәселелері.

Қоғамдық көлік қызметінің сапасы мен қолжетімділігі Қоғамдық кеңестің тұрақты бақылауында болуына орай, күн тәртібінде қаралатын мәселені зерделеу мақсатында 22 қазан күні кеңес мүшелері бірқатар автобус маршруттарына мониторинг ұйымдастырды.

Мониторинг барысында автобустардың қозғалыс кестесі мен аралықтары, көлік құралдарының техникалық жағдайы, жолаушыларға қызмет көрсету сапасы және аялдамалардың жай-күйі назарға алынды.

Аталған жұмыстардың нәтижелері бойынша Қызылорда қалалық Қоғамдық кеңесінің инновациялық даму, цифрландыру және кәсіпкерлік мәселелері жөніндегі комиссиясының төрағасы Эрик Мұстафаұлы қосымша баяндама жасап, анықталған кемшіліктерді атап өтіп, қоғамдық көлік қызметін жетілдіруге бағытталған бірқатар ұсыныстарын ортаға салды.

Ұсыныстар қатарында:

• Зейнеткерлер үшін жеңілдікпен жол жүру жүйесін енгізу мүмкіндігін қарастыру;

• Қоғамдық көлік маршруттарын оңтайландырып, маршруттар жеткіліксіз қамтылған шағын аудандар мен қаланың шеткі аумақтарына автобустар қатынасын ұйымдастыру. Орталық көшелердегі автобус қозғалысының шамадан тыс шоғырлануын азайтып, маршруттарды қала аумағында тиімді пайдалану;

• Ескі базар маңындағы автобус маршруттарын кептелісін азайту мақсатында Әбілқайыр хан, Қонаев және басқа да көшелер арқылы жүргізу мүмкіндігін қарастыру, жол инфрақұрылымын ретке келтіру;

• «Универсам» аялдамасының орналасуын қайта қарастырып, «№50 дәріхана» аумағына қарай жылжыту;

• Шүкіров көшесі арқылы қоғамдық көлік маршруттарын жүргізуді ұйымдастыру;

• Соңғы аялдамаларды санитариялық талаптарға сай абаттандыру, қажетті инфрақұрылымен (аялдама павильондары мен дәретханалар орнату, жол таңбаларын сызу) қамтамасыз ету;

• Аялдамалардағы электрондық ақпараттық таблолардың жұмысын қалпына келтіру және маршруттардың қозғалыс кестесін ақпараттық парақтар түрінде орналастыру.

Бұдан бөлек, отырыс барысында кеңес мүшелері «Қызылорда автобус паркі» директоры Ә.Маштаев сұрақтар қойып, автобус қызметіне қатысты өзекті мәселелерді талқылады.

Орын алған кемшіліктерді жою, жолаушыларға қызмет көрсету мәдениетін арттыру және қоғамдық көлік жұмысының тиімділігін жақсарту қажеттігін атап өтті.

Атап айтқанда, автобустар қозғалысы аралықтарының сақталмауы, аялдамаларда маршруттар туралы ақпараттың жеткіліксіздігі, аялдамалардың дауыстық хабарландырылмауы, қолма-қол төлемнің әлі де қолданылуы, мүгедектігі бар адамдар мен ардагерлерге арналған орындардың тиісті деңгейде белгіленбеуі, екінші және үшінші топтағы мүгедектігі бар адамдарға инватакси қызметін 50 пайыздық жеңілдікпен көрсету мүмкіндігін қарастыру, Наурыз шағынауданында қоғамдық көліктер санын көбейтіу, жүргізушілердің қызмет көрсету мәдениеті мен арнайы киім үлгісіне қатысты мәселелер айтылды. Сондай-ақ кешкі уақытта автобустар қозғалысының ерте тоқтап қалуы да назарға алынды.

Көтерілген мәселелер мен ұсыныстардың олардың орындалуын бақылауға алу және келесі отырыстарда атқарылған жұмыстардың нәтижелерін тыңдау ұсынылды.

Күн тәртібіндегі екінші мәселе бойынша қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы міндетін атқарушы М.Шөкенов баяндама жасады.

Оның мәліметінше, биыл қалада жылу беру маусымы 5 қазанда басталған. Жылумен қамтамасыз етуші кәсіпорындар сыртқы ауа температурасына сәйкес бекітілген кесте бойынша қазандықтардан жылу энергиясын тұрақты түрде берілуде.

Отырыс барысында тиісті мекеме басшыларына қысқы кезеңде тұрғындарды үздіксіз жылумен қамтамасыз ету және жылу беру маусымының қалыпты өтуін, қатаң бақылауға алу тапсырылды.

Қалалық Қоғамдық кеңес тарапынан көтерілген мәселелер мен ұсыныстардың орындалуы және тұрғындарға көрсетілетін қызмет сапасын арттыру бағытындағы жұмыстарды бақылау тұрақты жүргізілетін болады.

Отырыс «Facebook» әлеуметтік желісі арқылы тікелей эфирде көрсетілді.

Фото

Previous Next