Новости Казкенес
Новости KazKENESБүгінгі ауыл шаруашылығы қалай өзгерді?
Атырау облыстық қоғамдық кеңесінің жоспарлы отырысында «Атырау облысында агроөнеркәсіп кешенінің дамуы туралы » мәселе қаралды.
Атырау облыстық Қоғамдық кеңесінің Ауыл шаруашылығы мәселелері жөніндегі комиссиясы мәселені зерделеп, ұсыныстарын енгізді.
Ең өзекті мәселе – су тапшылығы. Кейбір аудандарда суару суы жетіспейді, кейбірінде оның құны өте жоғары, ал бірқатар аудандарда жемшөп дайындайтын шабындық жерлердің тапшылығы байқалады. Су мәселесін шешпей ауыл шаруашылығын дамыту мүмкін емес.
Келесі маңызды мәселе – электр энергиясының қымбаттығы. Электр тарифтерінің жоғары болуы өнімнің өзіндік құнын арттырып отыр. Суару, сақтау, қайта өңдеу және өндірістік процестердің барлығы қымбаттап кеткен. Сондықтан ауыл шаруашылығы тауарын өндірушілер үшін электр энергиясының қолжетімділігін қамтамасыз ету мәселесін қарастыру қажет. Биылғы жылы ерекше алаңдаушылық туғызған мәселенің бірі – қарақұрттардың жаппай көбеюі. Соның салдарынан ауыл шаруашылығы жануарларының қырылу фактілері тіркелуде. Бұл мәселе жедел әрі кешенді шараларды талап етеді.
Ерекше алаңдаушылық тудыратын мәселе – сібір жарасы және басқа да аса қауіпті аурулардан өлген жануарлар көмілген орындар.
Өнім өндіру – мәселенің жартысы ғана.
Екінші жартысы – оны өткізу.
Бүгінде көптеген фермерлер өз өнімдерін қаланың ең тиімді сауда орындарында сата алмай отыр.
Осыған байланысты «Аграршыларға арналған 100 сауда орны» бағдарламасына тоқталғым келеді.
Өкінішке қарай, бұл бағдарлама күткен нәтижені берген жоқ.
Фермерлерден сауда орындарының ашық емес бөлінгені, «өз адамдарын өткізу» қағидатының орын алғаны жөнінде көптеген шағым түсуде.
Бұл жағдай сыбайлас жемқорлық тәуекелдерін күшейтеді.
Сондықтан аталған бағдарламаға тәуелсіз талдау жүргізіп, оның шын мәнінде ауыл шаруашылығы өндірушілерінің мүддесіне қызмет етіп отырғанын анықтау қажет.
Тағы бір мәселе – кадр тапшылығы.
Әңгіме тек шопандардың, ветеринарлардың немесе механизаторлардың жетіспеушілігі туралы емес.
Ауыл шаруашылығы саласына жауапты мемлекеттік органдардың өзінде штаттық бірліктер жеткіліксіз. Аталған мәселелер зерделеніп, қоғамдық кеңестің қарарына енгізілді.
Фото
