Новости Казкенес
Новости KazKENESҚАЛАЛЫҚ ҚОҒАМДЫҚ КЕҢЕСТІҢ КЕЗЕКТІ ОТЫРЫСЫ ӨТТІ
Бүгін, 21 мамыр күні қалалық Қоғамдық кеңестің кезекті отырысы өтті.
Кеңес отырысына дербес бөлім басшылары, мекеме басшылары және бұқаралық ақпарат құралдарының өкілдері қатысты.
Күн тәртібінде келесі мәселелер қаралды:
1. «Ювеналды полиция инспекторларының кәмелетке толмағандар арасындағы құқық бұзушылықтың алдын алу бағытындағы жұмыстары туралы»;
2. «Қаладағы діни ахуал және діни тұрақтылықты қамтамасыз ету барысындағы жұмыстар туралы»;
3. «Қызылорда қаласының бас жоспары туралы»;
4. «Шаруа немесе фермер қожалығын, ауыл шаруашылығы өндірісін жүргізу үшін уақытша өтеулі жер пайдалану (жалдау) құқығын беру жөніндегі конкурсты ұйымдастыру туралы» .
Күн тәртібіндегі бірінші мәселе бойынша қалалық полиция басқармасы бастығының орынбасары, полиция полковнигі Н.Пазылов хабарлама жасап, балалар мен жасөспірімдер арасындағы құқық бұзушылықтың алдын алу, кәмелетке толмағандар арасындағы қылмыстың өсуіне жол бермеу және оларға қарсы жасалатын қылмыстардың алдын алу бағытындағы жұмыстар туралы баяндады.
2026 жылы кәмелетке толмағандар мен жастар арасында құқық бұзушылықтың алдын алу мақсатында «Балалар түнгі қалада», «Тәртіпті қала», «Абайлаңыз, балалар!», «Жасөспірім», «Квадрат» атты жедел-профилактикалық іс-шаралар тұрақты өткізіліп келеді.
Профилактикалық жұмыстар барысында қараусыз және қадағалаусыз жүрген, қаңғыбастыққа салынған кәмелетке толмағандар мен түрлі құқық бұзушылық деректері анықталып, 2389 әкімшілік хаттама толтырылған, 98 жасөспірім кәмелетке толмағандарды бейімдеу орталығына орналастырылған.
ІІО-ның деректер базасына 81 ата-ана мен 71 жасөспірім есепке алынып, олармен жеке профилактикалық жұмыстар жүргізілуде.
Ата-аналық міндеттерін орындамаған 3 ата-ана сот шешімімен ата-ана құқығынан айырылса, 2 ата-ананың құқығы шектелген.
Барлық құзырлы органдармен бірлесіп атқарылған алдын алу шараларының нәтижесінде кәмелетке толмағандар жасаған қылмыстар саны 30,8%-ға төмендегенімен, жасөспірімдер арасындағы топтық төбелес фактілері артып отыр.
Сонымен қатар, кәмелетке толмағандарға қарсы жасалған қылмыстар 38,1%-ға өскені атап өтілді.
Талдау нәтижесіне сәйкес, жасөспірімдер арасындағы құқық бұзушылыққа әсер ететін негізгі факторлар — ата-ана тарапынан бақылаудың жеткіліксіздігі, тәрбие жұмыстарының тиісті деңгейде жүргізілмеуі және отбасының әлеуметтік жағдайы.
Сондай-ақ, қазіргі таңда ғаламтор желісіндегі түрлі зиянды контенттер мен қауіпті сілтемелердің балаларға қолжетімді болуы алаңдаушылық туғызатыны айтылып, ата-аналарға балалардың әлеуметтік желідегі белсенділігін тұрақты бақылауда ұстау қажеттігін атап өтті.
Күн тәртібіндегі екінші мәселе бойынша қалалық қоғамдық даму бөлімінің басшысы Ж.Тажмаханов «Қаладағы діни ахуал және діни тұрақтылықты қамтамасыз ету барысындағы жұмыстар туралы» баяндама жасап, кеңес мүшелері өз ұсыныстарын білдірді.
Келесі , Қызылорда қаласының бас жоспары туралы мәселесіне орай қалалық сәулет және қала құрылысы бөлімі басшысының міндетін атқарушы Н.Баймырзаев пен «Казгипроград-1» жобалау институты ЖШС-нің директоры І.Темірбаевтың хабарламалары тыңдалды.
2025 жылы Қызылорда қаласының бас жоспарының қолданылу мерзімі аяқталуына байланысты, биыл жаңа бас жоспарды әзірлеу үшін ашық конкурс жарияланып, нәтижесінде Алматы қаласындағы «Казгипроград-1» жобалау институты ЖШС жеңімпаз атанған.
Жиында І.Темірбаев мекеменің республика көлеміндегі тәжірибесі мен оң нәтижелеріне тоқталып, қазіргі таңда бастапқы ақпараттарды жинақтау және қолда бар материалдарды нақтылау жұмыстары жүргізіліп жатқанын жеткізді.
Қызылорда қаласының бас жоспарға ирригациялық жүйелер мен инфрақұрылыммен қамту, тұрғын үй құрылысы мәселелеріне айрықша мән берілген. Талқылау барысында жаңа жобалық жұмыстардың дайындығына кеңес мүшелері оң бағасын беріп, ұсынысқа қолдау білдірді.
Күн тәртібіндегі төртінші мәселе бойынша қалалық ауыл шаруашылығы және жер қатынастары бөлімінің басшысы М.Әжібеков хабарлама жасап, қойылған сұрақтарға жауап берді.
Қоғамдық кеңес отырыснда айтылған ұсыныс-пікірлер хаттамаға енгізіліп, тиісті мекемелерге жолданатын болады.
Отырыс «Facebook» платформасы арқылы тікелей эфирде көрсетілді.
Жиынға кеңес төрағасы М.Кәрімбаев төрағалық етті.
Фото
