Новости Казкенес

Тараз қалалық Қоғамдық кеңестің облыс орталығының жасыл желекке көмкерілуі мен сәулеттік келбетінің ахуалына қатысты кеңейтілген отырысы өтті

Тараз қалалық Қоғамдық кеңесінің 2025 жылдың 4 желтоқсанында  Тараз қалалық әкімдігінің мәжіліс залында Қазақстан Республикасының Президенті жариялаған «Заң және тәртіп» стратегиялық концепциясына, Қазақстан Республикасы Үкіметінің 2025 жылғы 1 сәуірдегі № 200 қаулысымен бекітілген «Қоғамда заң мен тәртіп идеологиясын ілгерілету жөніндегі 2025 – 2030 жылдарға арналған тұжырымдаманың»  5-бөлімінің 5.1, 5.2-тармақтары, сәйкесінше «Заң үстемдігі және заңның жалпыға бірдейлігі» және  «Ашықтық және есептілік» қағидаттарына мақсаттас «Тараз қаласын көгалдандыру, абаттандыру және сәулеттік келбетін көркейту жұмыстарының жәй-күйі туралы» мәселеге арналған кеңейтілген отырысы өткізілді.

Аталмыш шараға «Әулие ата» және «Жібек жолы» аудандары, әкімдіктің салалық бөлімдерінің басшылары мен округтердегі бас инспекторлар, «Жасыл ел – Тараз» ЖШС басшылығы қатысты.

Жиын барысында, Күн тәртібіне сәйкес зерделеу жүргізган Қоғамдық кеңестің сараптама тобының қорытындысы баяндамасы оқылып, әкімдіктің тұрғын жай-коммуналдық шаруашылық, жолаушы көлігі және автомобиль жолдары, сәулет және қала құрылысы  бөлімдері басшыларының есептері тыңдалды.

Қос тараптың уәждері қатысушылар назарына ұсынылғаннан соң, нәтижесі мынадай болды:

  1. Облыс орталығын жасыл желекке көмкеру ісінде жылдар бойы кемшіліктер орын алып отырған. Атап айтқанда, егілген тал-дарақтардың барлығы дерлік өзге өңірлерден жеткізіліп, егілуі. «Қызыл абад» алабы мен 15 мөлтек ауданда отырғызылған ағаштарды күтіп-баптаудың талапқа сай болмауы, мердігерлермен келісім-шарттың тендерлік рәсімсіз, тікелей жасалынуы, олардың тарапынан міндеттемелерін өз деңгейінде орындамауы, жүйелі түрде суғару мен күтім жасау технологияларының сақталмауы әсерінен, тал-дарақтардың ауруға шалдығуы, ондаған мың түп талдың мүлдем өнбей қалуы фактілері анықталды.
  2. Қаладағы тал-дарақтарды суғаруда кеңес заманынан қалған арық-атыздардың басым бөлігінің мүлдем қолданылмайтындығы белгілі болды. Қаланың ішімен өтетін каналдар мен лотоктар,  арықтарды басқаруға жауапты органның мүлдем болмауы, соған сәйкес келеңсіздіктерді жою, алдын-алу жұмыстарының кенжелеп тұрғаны мәлім болды. Бұл – жергілікті әкімдіктің шұғыл назарына алуы қажет мәселе екенін уақыт пен қалыптасқан жағдай айқындап беріп отыр.
  3. Әл-Фараби көшесінің Төле би даңғылынан бастап, Сейфуллин көшесіне дейінгі аралығындағы бірбағытты жолдардың ортасындағы күрделі ғимараттардың барлығының заңсыз соғылғандығы анықталды. Оған дәлел ретінде, аталмыш нысандардың астында ауыз су мен шайынды судың трассалық құбырларының жатқандығы, нысаналы мақсатының - саябақ екендігі айтылды.
  4. ҚР заңнамасы бойынша айналасында диаметрі 1000 метр қашықтықта ешбір ғимарат болмауы тиіс «Сібір жарасының» Жансая мөлтек ауданындағы ошағынан бар-болғаны 5-6 метр қашықтықты құрайтын, жол ғана бөліп тұрған жерде ғимараттың жартылай соғылып тұрғаны, оны бұзу жөнінде ешбір көзге көрінер шараның қолға алынбай отырғаны жауапты мемлекеттік мекемелердің назарына Қоғамдық кеңес тарапынан кезекті рет айтылды.

 

Осы және өзге де келеңсіздіктер бойынша ҚР заңнамасына сәйкес талаптарды орындау бойынша Тараз қалалық Қоғамдық кеңес өз өкілеттігі шеңберінде атқарушы органдарға ұсынымдар жолдайтын болады.

Фото