Қоғамдық кеңес отырысы

Әділетсіз газ схемасы туралы Қоғамдық Кеңесте ашық айтылды!

Атырау облыстық қоғамдық кеңесінің жоспарлы отырысында 2025-2026 жылдарға жылыту маусымының өту барысы туралы мәселені талқылау барысында күрделі мәселе бой көтерді.

1993 жылдан бері ТЭЦ-ке газды өндірістік төмен бағамен беріп келе жатырған ТШО компаниясы 2026 жылдан бастап бермейтін болып жатыр, газ QazaqGaz арқылы жеткізілетін болады, сөйтіп, ТЭЦ-тің газды сатып алу бағасы 4 төрт есе қымбаттап кетпек.

Бұл нені білдіреді?

- Электр тарифі 40%-дан аса, ал, жылу тарифі 90%-ға дейін өсіп кетеді.

Яғни, әрбір отбасының, әрбір кәсіпкердің шығыны бірнеше есеге өседі.

Ал берілетін газ – сол газ. Сол Теңіз кенішінен шыққан, сол магистральдан өтетін, сол қысыммен берілетін ресурс.

Тек бір өзгеріс - делдал (посредник) пайда болды - бұрын газды өндірушіден ТЭЦ тіке алатын енді QazaqGaz арқылы, 4 есе қымбатқа алуы тиіс.

Бұл – Атырау халқының қалтасына тиетін тікелей соққы.

Ең сорақысы – мұндай делдалдық сызба заңға да қайшы.

«Газ және газбен жабдықтау туралы» заң бойынша магистральға тікелей қосылған тұтынушы газды тікелей өндірушіден сатып алу керек. Біздің ТЭЦ – магистральға тіке қосылған дәл осындай тұтынушы.

Тарифтердің өсуі - қаладағы әлеуметтік тұрақтылыққа, экономикаға, бизнеске, әр отбасының өміріне төнген қауіп.

Бұл заңсыз әрі негізсіз шешімнің әлеуметтік-экономикалық салдары өте ауыр, сондықтан оны «бизнес шешімі» деп қарауға болмайды. Бұл - тек ТШО мен ЖЭО арасындағы келісімшарт дауы емес - мемлекет деңгейінде реттелетін ұлттық қауіпсіздік мәселесі.

Қоғамдық Кеңес атынан ҚР-сы Үкіметінің басшысы О.Бектеновке ТШО мен QazaqGaz арасындағы келісімшартты тоқтатуды, ТШО-ның 2026 жылдан бастап Атырау ЖЭО-ға газ беруден бас тарту шешімін қайта қарауға ықпал ету жөнінде ұсыныспен шығады,  ал, облыс әкімдігіне - тарифтердің өсуіне жол бермеу және Атырау өңірінің негізгі энергия кәсіпорнының тұрақты жұмысын қамтамасыз ету мақсатында жедел ведомствоаралық үйлестіруді ұйымдастыруды ұсынды.

          Отырыста бұдан басқа «2024-2025 жылдарға жобалық-сметалық құжаттаманы жетілдіру және сараптама қызметінің тиімділігін арттырудағы жасалған жұмыстар туралы»  Құрылыс, сәулет және қала құрылысы  басқармасының басшысы Н.Құсайыновтың баяндамасы тыңдалды.

Фото

Previous Next