АТЫРАУ ОБЛЫСТЫҚ ҚОҒАМДЫҚ КЕҢЕСТЕ СЫБАЙЛАС ЖЕМҚОРЛЫҚҚА ҚАРСЫ ІС-ҚИМЫЛ САЛАСЫНДАҒЫ ЖҰМЫСТАР ТЫҢДАЛДЫ

---

Жуырда облыстық қоғамдық кеңесте «Сыбайлас жемқорлыққа қарсы іс-қимыл саласында 2021 жылы және 2022 жылдың І жартыжылдығында атқарылған жұмыстардың нәтижелері» талқыланды. Кеңес отырысына облыс әкімінің орынбасары Қайрат Нұрлыбаев, облыстық басқарма басшылары және кеңес мүшелері, БАҚ өкілдері қатысты. Күн тәртібіндегі мәселе бойынша Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Атырау облысы бойынша департаментінің басшысы Ерлан Досанов «Сыбайлас жемқорлыққа қарсы іс-қимыл саласындағы атқарылған жұмыстардың нәтижелері туралы» баяндады. Есепті мерзім ішінде мемлекеттік органдар, мекемелер мен қоғамдық ұйымдармен бірлесе отырып, сыбайлас жемқорлықтың алдын алуға бағыттталған 900 мың адамды қамтыған түрлі шаралар ұйымдастырылған. Мемлекеттік органдарда сыбайлас жемқорлық тәуекелдеріне сыртқы талдау жүргізу нәтижесінде 170 ұсыным, яғни, 2021 жылы -111, күні бүгінге дейін-59 енгізілген. Сонымен қатар, мемлекеттік сатып алу веб-порталына жүргізілген мониторинг қорытындысында берілген ұсыным бойынша 99 мемлекеттік орган 1,5 млрд. теңгеден астам қаржыны үнемдеген. Алдын алу шаралары шеңберінде 21 лауазымды тұлға тәртіптік жауапкершілікке тартылып, 10 тұлғаға әкімшілік құқық бұзушылық үшін 4 млн.теңгеден астам айыппұл салынған. Қоғамдық кеңес мүшелері сыбайлас жемқорлықтың алдын алу шараларын жандандыру, мемлекеттік сатып алу бойынша заңсыздықтардың алдын алу, мектеп құрылысына бөлінген қаражатты мақсатсыз пайдалануға жол бермеуді қадағалау, мекемелердегі комплаенс қызметінің тек қана қағаз жүзінде орындалып отырғандығы, «Сенім жәшіктерінің» ашықтығы туралы мәселелерді көтеріп, ұсыныстарын айтты. Кеңес төрағасы Мақсым Ізбасов отырысты қорытындылап, қоғамдағы сыбайлас жемқорлыққа қарсы мәдениетті қалыптастыруға бағытталған жұмыстарды қоғам болып жүргізу қажеттілігін атап өтті.