ТАЗА ҚАЗАҚСТАН: ЕЛІМІЗДІ КӨРКЕЙТУ – БАРШАМЫЗҒА ОРТАҚ МІНДЕТ

 “Таза Қазақстан” жалпыұлттық экологиялық акциясы аясында ұйымдастырылған республикалық “Қоғамдық экобақылау” акциясы 23 маусымда Жамбыл облысының Қордай ауданында өткізілді.

 Жамбыл облыстық Қоғамдық кеңесінің мүшелері Архабек Төлебаев, Пернебек Оспанов аудан әкімдігінің қызметкерлері және аудандық Қоғамдық кеңес мүшелерімен бірлесе отырып, абаттандыру, көгалдандыру, жасыл желектерге күтім жасау, қалдықтарды жинау, тасымалдау және орналастыру барысына бақылау жүргізді.

 Қордай ауданы – Тараз қаласынан шығысқа қарай 300 км қашықтықта орналасқан, өңіріміздің ең ірі аудандарының бірі және әкімшілік бөлігі болып табылады.

 Қордай жері табиғатының қолайлылығы, аудан жерімен Шу өзенінің және бірнеше кішігірім өзендердің ағуы – ауданның экологиялық-экономикалық жағдайының жақсаруына, ирригациялық жүйелерді тиімді пайдалануға тікелей ықпал етеді.

 Топ мүшелері Қордай ауылының мәдени-көпшілік демалыс орындарын – Емен саябағы, орталық саябақ, балалар ойын алаңшалары, сондай-ақ қоғамдық орындардың, көшелердің абаттандырылуы, тазалығы, жасыл желектерді суару, оларға күтім жасау барысын мұқият бақылап шықты.

 Бақылау қорытындысы көрсеткендей, “Таза Қазақстан” акциясы аясында қырғыз елі және Алматы облысымен шекаралас Қордай ауданында қоршаған ортаны таза ұстау, қоғамда экологиялық мәдениетті қалыптастыру бағытында жүргізілген кешенді көгалдандыру, абаттандыру, санитарлық тазалау жұмыстары жергілікті атқарушы органдар мен қоғамдық кеңестер тарапынан басты назарда екенін дәлелдейді.

 Таза қоршаған орта – ортақ жауапкершілік!

Фото

Previous Next