АЗАМАТТЫҚ ФОРУМ: ҚОҒАМ МЫҚТЫ БОЛСА, МЕМЛЕКЕТ ҚУАТТЫ БОЛАДЫ

Жамбыл облысының Азаматтық Альянсы мен облыс әкімдігінің ақпарат және қоғамдық даму басқармасының ұйымдастыруымен 10-11 маусым күндері «Мықты қоғам – Қуатты Қазақстан» ұранымен XII өңірлік Азаматтық форум өтті. Бұл форум еліміздің әр аймағынан келген азаматтық сектор мамандарын бір арнаға тоғыстырып, қоғамдық даму мен азаматтық бастамалар төңірегіндегі маңызды мәселелерді ортаға салды.

Форумның екінші күні Азаматтық қоғамды дамыту тұжырымдамасының 2026–2030 жылдарға арналған екінші кезеңін іске асыру жөніндегі ұсынымдар әзірлеуге бағытталған конференциямен басталды. Конференцияны облыс әкімінің орынбасары Серік Сәлемов ашып, аталмыш шараның ел дамуындағы маңыздылығын атап өтті. Ол Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасы мен «Адал еңбек – Адал азамат – Адал табыс» қағидаттарын негізге ала отырып, азаматтық қоғам институттарының айрықша рөліне тоқталды. Оның айтуынша, бүгінде облыста 1494 үкіметтік емес ұйым тіркелсе, соның 1100-і нақты жұмыс істеп тұр. Бұдан бөлек, өңірде 75 этномәдени бірлестік, 41 діни ұйым және 7 саяси партияның филиалдары бар.

Жиында Жамбыл облысы мен ел аумағында азаматтық қоғамды қолдауға бағытталған нақты жобалар мен қаржыландыру тетіктері де сөз болды. Биылдың өзінде ғана 1 млрд теңгеден астам қаражат мемлекеттік әлеуметтік тапсырыстарға бөлініп, 140-тан аса жобаны жүзеге асыру көзделіп отыр. Оның ішінде жалпы қаржының 76,4%-ы әлеуметтік осал топтарға бағытталған болса, қалған 23,6%-ы білім, денсаулық сақтау, сыбайлас жемқорлыққа қарсы мәдениет, жастар саясаты, діни сауаттылық және отбасы құндылықтарын насихаттауға арналған.

Форум аясында түрлі секциялық отырыстар, конференциялар, мастер-класстар мен пленарлық жиындар өтіп, азаматтық қоғамды дамытудың нақты бағыттары бойынша ойлар мен ұсыныстар айтылды. ҚР Мәдениет және ақпарат министрлігінің Азаматтық қоғам істері комитетінің төрағасы Гүлбара Сұлтанова, «Қазақстан халқына» қорының басқарма төрайымы Ләззат Шыңғысбаева, қордың Қамқоршылық кеңесінің төрайымы Бану Нұрғазиева сияқты елге танымал тұлғалар азаматтық қоғам институттарын кәсібилендіру, мемлекеттік басқару мен қоғамдық бақылауға белсенді тарту бағытында нақты ұсыныстарын ортаға салды.

Форум соңында өңірдің әлеуметтік-экономикалық дамуына сүбелі үлес қосқан белсенділер облыс әкімінің Құрмет грамотасы және арнайы сертификаттармен марапатталды. Атап өтерлігі, форум жұмысына Жамбыл облыстық қоғамдық кеңесінен 14 адам қатысып, олардың еңбегі форум аясында жарық көрген жинаққа да енген.

Фото

Previous Next