Новости Казкенес

ҚОҒАМДЫҚ БАҚЫЛАУ ӨТКІЗІЛДІ

Бүгін Мақтаарал аудандық қоғамдық кеңесінің мүшелері «Қоғамдық бақылау туралы» ҚР Заңының аясында Мақтаарал ауданының Мырзакент кентіндегі №1 «Мырзакент» мектеп гимназиясы ғимаратының күрделі жөндеу жұмыстарына қоғамдық бақылау жүргізді.

Қоғамдық бақылауға қоғамдық кеңес мүшелері Шыңғыс Сатыбалдиев пен Гулмира Оракбаева, Мақтаарал ауданының білім бөлімі басшысының м.у.а Асанхан Қошқаров, Мақтаарал аудандық мәслихатының төрағасы Қадыр Сарсекбаев, Мырзакент кентінің әкімі Мамыр Бейсенбаев, «Construction Group «SAMRUK» ЖШС-нің директоры Елдос Байысбаев және №1 «Мырзакент» мектеп гимназиясының әкімшілік қызметкерлері қатысты.

Күрделі жөндеу жұмыстарын «Construction Group «SAMRUK» ЖШС мердігер компания жүргізуде. Құрылыс жұмыстары 2025 жылдың 28 мамырында басталды. Аяқталу мерзімі 2026 жылдың 31 тамызы.

Қоғамдық бақылау барысында мердігер компанияға күрделі жөндеу жұмыстарына байланысты бірнеше ұсыныстар берілді. Өз кезегінде мердігер компанияның директоры Е.Байысбаев мектеп ғимаратының шатырын ауыстыру, сынып бөлмелерін жаңарту, жылу, су және электр жүйелерін ретке келтіру, сондай-ақ санитарлық тораптарды заманауи талаптарға сәйкестендіру бойынша жүргізіліп жатқан жұмыстармен таныстырды.

Қоғамдық бақылау барысында Мақтаарал аудандық Қоғамдық кеңесінің мүшелері ең алдымен барлық жұмыс белгіленген мерзімнен ауытқымауы керек екендігін еске салып, сапалы және тиісті стандарттарға сәйкес аяқталуы керектігін атап өтті.

Қоғамдық бақылау кезінде, Қоғамдық кеңес мүшелері мен бақылау жұмысына қатысушылар мектеп ғимаратын аралап, жүргізіліп жатқан жұмыстарға өз бағаларын берді.

Мектеп әкімшілігін алаңдататын негізгі мәселенің бірі – жылу қазандығы мен жылыту жүйесі. Осы ретте Мақтаарал аудандық мәслихатының төрағасы Қ.Сарсекбаев мектеп ғимаратының жылу жүйесін толық жаңарту мен жылу қазандығының қуаттылығын көбейтуді ұсынып, жауапты мекемелер жұмыс сапасын ұдайы бақылап отыруы тиіс екендігін айтып өтті.

Қоғамдық бақылау нәтижесінде №1 «Мырзакент» мектеп гимназиясы ғимаратының күрделі жөндеу жұмыстарына талдау жүргізіліп, тиісті ұсыныстар берілді.

Фото