ҚР ІІМ Қоғамдық кеңесінің мүшелері ҚР ІІМ кадр даярлау жүйесімен танысты

---

 

2022 жылдың 29 сәуірінде ҚР Ішкі істер министрлігінің Қоғамдық кеңес мүшелері ҚР ІІМ М.Есболатов атындағы Алматы академиясына барды. Қонақтарға реформа аясында ішкі істер органдары үшін кадрлар даярлау жүйесі таныстырылды.

ІІМ Алматы академиясының бастығы Айдар Сейтбеков ведомстволық білім беру жүйесінің қазіргі міндеттері мен оны реформалау шаралары туралы айтып берді. Өзекті мәселелердің ішінде ведомстволық ЖОО-ның материалдық-техникалық жабдықталуы, ТМД-ның көршілес елдеріндегі осындай оқу орындары Қазақстанмен салыстырғанда айтарлықтай қолдауға ие екендігі, ІІМ Алматы академиясы нысандарының басым бөлігі өткен ғасырдың ортасында салынғандығы да аталып өтті.

Сондай-ақ, Қоғамдық кеңес мүшелеріне Академия 2021 жылы бастаған «Оқу жетістіктерін бағалаудың инновациялық жүйесі» пилоттық жобасы ұсынылды. Бұл жоба басшы және орта басшы құрамды даярлайтын №1 және №2 факультеттерінің білім алушыларын қамтиды.

Осындай жүйе 2022 жылы жоғары оқу орнынан кейінгі білім беру факультетінде (№3 факультет) енгізілуде, 2023 жылы кәсіби дайындық факультетінде (№4 факультет) енгізу жоспарлануда.

Одан әрі ІІМ Алматы академиясы бастығының ғылыми жұмыстар жөніндегі орынбасары Жанат Ділбарханова заманауи жағдайда ішкі істер органдарын басқаруды ұйымдастырумен және енгізілген оқу модульдерімен таныстырды. Академияда сондай-ақ оқу жетістіктерін бағалаудың инновациялық жүйесі, атап айтқанда, білім алушының жеке рейтингі, тыңдаушының үлгерімі, жаңа ІІО форматындағы басшы құрамын даярлау қолданылады.

Сөз соңында Қоғамдық кеңес мүшелері ҚР ІІМ жүйесіндегі проблемалық мәселелерге қатысты өз пікірлері мен көзқарастарын білдірді. ҚР ІІМ Қоғамдық кеңесінің мүшесі, блогер, «Amanat» партиясы жанындағы Отбасы, әйелдер және балалардың құқықтарын қорғау жөніндегі республикалық қоғамдық кеңестің мүшесі Жанар Ахметова ІІМ Академиясының IT-саласындағы жүйесін жетілдіру қажет деп санайды.

Өз кезегінде Жанат Ділбарханова Академияның IT-саласындағы қызметінің нәтижелері туралы айта келіп, алайда материалдық-техникалық қамтамасыз ету мәселелерін шешудің қажеттілігіне, интернеттегі алаяқтықпен күресу үшін қымбат бағдарламалық жасақтама қажеттігіне тоқталды. Аккаунттарды жабу алаяқтықты жеңуге мүмкіндік бермейтітінін, бұл алаяқтық үшін жаңа аккаунттардың ашылуымен жалғасатындығын атап өтті. Сондай-ақ Жанат Ділбарханова әлемдік тәжірибеде құқық қорғау органдарының әлеуметтік желілердегі алаяқтықпен күресу үшін кейбір жағдайларда тіпті «ақ қалпақты хакерлердің» қызметіне жүгінетінін айтты.

ҚР ІІМ Қоғамдық кеңесінің мүшесі, Әл-Фараби атындағы Ұлттық университет жанындағы Адам құқықтары жөніндегі ҒЗИ директоры, Адвокаттар одағының президенті Әнуар Түгел өз сөзінде халықпен диалог жүргізген адвокаттардың жеке рөлін атап өтті.

ҚР ІІМ Қоғамдық кеңесінің төрағасы Рахым Ошақбаев қаңтар айындағы оқиғалар кезінде тұрғындар да, құқық қорғау органдарының қызметкерлері де зардап шеккенін атап өтті. Алайда қаңтар оқиғасы бойынша тергеу кезінде адам құқықтарын бұзу фактілерінің болғандығына, сондықтан тергеушілердің кабинеттеріне бейнекамераларды орнату мәселесі де өзекті екендігіне тоқталды.

ҚР ІІМ Қоғамдық кеңесінің мүшесі, ҚР Парламенті Мәжілісінің депутаты Сырым Атамбаев ішкі істер органдары қызметкерлерінің әлеуметтік қорғалуын реттейтін нормативтік-құқықтық актілердегі олқылықтарға тоқталды және өз өкілеттігі аясында тиісті заңнамаға өзгерістерді қолдауға дайын екенін атап өтті.

Академиядағы кездесуге сырттан да сарапшылар шақырылды. Халида Әжіғұлова ұстаздық қызметтегі тәжірибесімен бөлісті отырып, тәжірибелік ұсыныстарын ұсынды. ҚР ІІМ Академиясының қызметкерлері мектепте аптасына 1 сағат сабақ беруге және білім алушыларға ҚР ІІМ жүйесі үшін кадрлар даярлаудағы жұмыстармен таныстыруға дайын болу керек деді. Екінші ұсынысы ІІМ Академиясының ішінде болуы мүмкін тұрмыстық жанжалдардың алдын алу жұмыстарын жүргізу болды.

Қоғамдық кеңес мүшесі, «Ашық жүрек» ҚБ еріктісі, ҚР Іскер әйелдер қауымдастығы төрағасының орынбасары Баян Тойкебаева Халида Әжіғұлованың ұсыныстарын қолдап, осы бастамаларға жәрдемдесуге дайын екенін мәлімдеді.

ҚР ІІМ Қоғамдық кеңесінің төрағасы Рахым Ошақбаев отырысты қорытындылай келе, тек Академияда ғана емес, сонымен қатар бүкіл республика бойынша кадрларды даярлау және қайта даярлау жүйесін жаңарту қажеттігін атап өтті. Азаматтардың құқықтарын қорғау, полиция қызметкерлерінің өкілеттіктері, материалдық-техникалық қамтамасыз ету, әлеуметтік желілердегі киберқылмыспен күрес мәселелері өзекті болып қалды. 

Осы кездесудің қорытындысы бойынша Қоғамдық кеңес болашақ тәртіп сақшыларын даярлауды қоса алғанда, Ішкі істер органдары жүйесін жетілдіру мақсатында ұсынымдар пакетін дайындауға ниетті.