Қазкеңес жаңалықтары
KazKENES жаңалықтарыКезектен тыс отырыс өтті.
16 қазан 2025 жылы келіп түскен нормативтік құқықтық актілердің жобаларын қарау қажеттігі бойынша Зайсан аудандық қоғамдық кеңесінің кезектен тыс отырысы өткізілді. Отырысқа 14 қоғамдық кеңес мүшелерінің 12 мүшесі қатысты.
Зайсан аудандық мәслихатының «Зайсан аудандық мәслихатының кейбір шешімдерінің күші жойылды деп тану туралы» және «Зайсан ауданында тұрғын үй көмегін көрсетудің мөлшері мен тәртібін айқындау туралы» аудандық мәслихаттың қарауына ұсынылатын шешім жобалары бойынша аудандық жұмыспен қамту және әлеуметтік бағдарламалар бөлімінің басшысы Ж.Б. Қинашева хабарламалар жасады. Қоғамдық кеңес мүшелері күн тәртібіндегі мәселерді қарап талқылай келе шешім жобаларын өзгеріссіз мақұлдады.
Күн тәртібіндегі келесі мәселе «Зайсан ауданы бойынша конкурсқа ұсынылатын ауылшаруашылығы мақсатындағы жер учаскелерінің тізімі туралы» мәселе бойынша Зайсан аудандық жер қатынастары бөлімінің басшысы Е.Қайрақбаев хабарлама жасап конкурсқа ұсынылатын жер учаскелерінің тізімімен таныстырып өтті. Қоғамдық кеңес мүшелері конкурсқа ұсынылып отырған жер телімдерін қарап талқылай келе, тізімдегі жер учаскелерін конкурсқа шығаруды мақұлдады.
Күн тәртібіндегі «Аудан мектептеріндегі оқушыларды тегін ыстық тамақпен қамту жағдайы туралы» мәселе бойынша аудандық білім бөлімінің басшысы М.Мұратқызы хабарлама жасады. Өз хабарламасында ол аудандағы 28 мектепте 3875 бала ыстық тамақпен қамтылғанын, оның ішінде 1-4 сыныптардағы барлық оқушылар яғни 2674 бала және әр түрлі тұрмыс жағдайларына байланысты 5-11 сыныптардағы 1201 бала бір мезгіл ыстық тамақпен қамтылған. Ыстық тамақ 26 мектепте мектеп асханасын жалға алушы кәсіпкерлер, екі мектепте штаттағы аспазшылар арқылы ұйымдастырылған. Бір мезгіл тамақтанудың құны бастауыш оқушылар үшін бір оқушыға 722 тенге, 5-9 сынып оқушылар үшін 807 тенге, 10-11 сынып оқушылары үшін 871 тенге екенін айтып өтті. Бірақ бұл қаражаттар биылғы оқу жылынан бастап іске қосылған жаңа тамақ мәзірлерін ескергенде кәсіпкердің нақтылы шығындарын жаппайтындығын айтып өтті. Бірақ қосымша барлық мүмкіндіктер пайдаланылып ас мәзірі сақталып отырғанын жеткізді. Осы мәселе бойынша аудандық санитарлық - эпидемиологиялық бақылау басқармасының басшысы Н.З.Каирлинаның хабарламасы тыңдалды. Ол оқушылардың ыстық тамағын ұйымдастыру биылғы оқу жылында міндетті ас мәзірінің өзгеруіне байланысты қайшылықтар болып тұрғанын, бірақ соған қарамастан ас мәзірінің түрі мен сапасы, көлемі сақталып отырғанын айтып өтті. Барлық мектептердегі асханалардың жағдайы санитарлық бақылауда екендігін айтып өтті.
Мәселені жан жақты талқылау үшін отырысқа мектеп асханаларын жалға алушы кәсіпкерлер де шақырылған болатын. Олардың да пікірлері тыңдалды. Олар өз сөздерінде әр балаға тамақтануға бөлініп отырған қаражаттың жаңа ас мәзірін қолдану кезінде жетіспейтіндігін, тамақ өнімдерінің қымбаттап кеткенін, аспаздарға төленетін еңбек ақы шығындарын, асхана жұмысына байланысты коммуналдық шығындарын, асхана арендасын, салық төлемдерін, санитарлық тазалық заттарын сатып алу шығындарын тағы басқа да шығындарын жаппайтынын жеткізді. Соған қарамастан қосымша мүмкіндіктерін пайдаланып бюджет тарапынан бөлініп отырған қаражатты тек балалар тамағына қажетті өнімдерді сатып алуға жұмсап отырғандарын жеткізді. Асхана буфетін пайдаланып, қосымша мектеп мұғалімдеріне, тегін ыстық тамақпен қамтылмаған оқушыларға өздерінің тамақ өнімдерін сатып, сондай ақ ас мәзірін дайындауға өздерінің шаруашылықтарының өнімдерін пайдаланып шығындарын жауып, аз маз пайда тауып отырғанын айтып өтті. Соған қарамастан тексерулердің өте көп екендігіне өз реніштерін білдірді.
Жарыс сөзге шыққан Қоғамдық кеңес мүшелері де өз пікірлерін айтып, мәселені асханаларға барып қосымша зерделеп шешу қажеттігін айтты. Қоғамдық кеңес төрағасы М.Уәли отырысты қорытындылап, кәсіпкерлерге бұл мәселені облыстық білім басшылығына жеткізетіндігін, сондықтан жаңа ас мәзірі бойынша нақтылы шығындар сараптамасын (калькуляциясын) жасап әкелуді сұрап, кәсіпкелерге балаларды ас мәзіріне сәйкес сапалы ыстық тамақпен қамтамасыз ете берулерін сұрап, еңбектеріне табыс тіледі.
Аудандық Қоғамдық кеңестің ақпараттық орталығы.
Фото
