Қазкеңес жаңалықтары

ҚЫЗЫЛОРДА ОБЛЫСЫНЫҢ ҚОҒАМДЫҚ КЕҢЕСІНІҢ КЕЗЕКТІ ОТЫРЫСЫ ӨТТІ

21 қазан күні «Студенттер сарайының» мәжіліс залында Қызылорда облысының Қоғамдық кеңесінің төрағасы Ә. Хожбановтың төрағалығымен облыстық қоғамдық кеңестің кезекті отырысы өтті. Отырысқа облыстық мәслихат хатшысы Н. Байқадамов, күн тәртібіндегі сұрақтарға қатысы бар атқарушы, құқық қорғау орган басшылары және мамандары, бұқаралық ақпарат құралдары өкілдері қатысты.
Күн тәртібінде төмендегідей мәселелер қаралды. Олар:
1. Қызылорда облысында 2020-2022 жылдар аралығындағы әлеуметтік нысандар мен жол құрылыстарын жүргізу барысы мен облыстық құрылыс, сәулет және қала құрылысы басқармасының сыбайлас жемқорлықтың алдын алу бойынша атқарған жұмыстары туралы.
2. Қазақстан Республикасының мемлекеттік қызмет істері агенттігінің Қызылорда облысы бойынша департаментінің облыстағы мемлекеттік қызметтерді көрсету бағытындағы жұмыстарының жай-күйі туралы.
3. Қоғамдық кеңестердің республикалық III мәжілісінің жұмысы туралы.
Негізгі мәселе бойынша облыстық қоғамдық кеңестің құқықтық қамтамасыз ету жөніндегі комиссиясының төрайымы Л. Бақтыбаева комиссия тарапынан жүргізілген сараптамалық зерделеу жұмыстарын баяндады.
​Сонымен қатар, облыстық құрылыс, сәулет және қала құрылысы басқармасының басшысы Е. Төрәлиевтің 2020-2022 жылдар аралығындағы құрылыс жұмыстары мен басқарманың сыбайлас жемқорлықтың алдын алу бойынша атқарған жұмыстары туралы есебі тыңдалды.
Ал облыстағы жол құрылысының жүргізілу барысы жөнінде облыстық жолаушылар көлігі және автомобиль жолдары басқармасының басшысы П. Шамұратов баяндама жасап, сұрақтарға жауап берді.
Облыстағы әлеуметтік нысандар мен жол құрылысындағы анықталған кемшіліктер атап көрсетіліп, тиісті басқармаларға кемшіліктерді жою бағытындағы ұсынымдар берілді.
Күн тәртібіндегі екінші мәселе бойынша Қазақстан Республикасының мемлекеттік қызмет істері агенттігінің Қызылорда облысы бойынша департаментінің басшысы, Әдеп жөніндегі кеңес төрағасы Ғ. Тұрсынбаев мемлекеттік қызметтерді көрсету сапасын бақылау бағыты бойынша 2022 жылдың 9 айында облыста атқарылған шаралар және мемлекеттік аппаратты бюрократиядан арылту мәселелері туралы баяндама жасады.
Қоғамдық кеңес мүшелері тарапынан бірқатар ұсыныстар беріліп, қаралған мәселе бойынша өз сұрақтарына жауаптарын алды.
Жақында Астана қаласында өткен Қоғамдық кеңестердің
III республикалық мәжілісінің жұмысы туралы делегат болып қатысқан облыстық қоғамдық кеңестің мүшесі Н. Көптілеуов хабарлама жасап, мәжілісте қоғамдық кеңестердің жұмыстарын жетілдіру, қоғам мен билік арасындағы байланысты жақсарту, ақпараттық ашықтықты қамтамасыз ету, ұсыныстар мен ұсынымдар әзірлеу, қоғамдық кеңестердің қызметін бағалау жүйесін қалыптастыру бағытындағы жұмыстар талқыланғанын хабарлады.