Халық наразылығы Қоғамдық кеңес НАЗАРЫНДА

---

 Облыстық Қоғамдық кеңесі «мектеп оқушыларынан қаражат жиналып жатыр»- деген ата-аналардың наразылығы негізінде, кеңестің «сыбайлас жемқорлыққа қарсы қоғамдық бақылау, құқық қорғау мәселелері» жөніндегі комиссия мүшесі Сәкен Өскенбаев, «әлеуметтік, мәдени  даму мәселелері» жөніндегі комиссия мүшесі Нұрайнаш Камалова зерделеу жұмыстарын жүргізу мақсатында  қалалық білім беру бөлімі басшысының орынбасары Аманбай Хұсыновпен, қалалық білім бөлімінің жалпы білім беру секторының меңгерушісі  Ақмарал Ермековамен  кездесті.

 Кездесу барысында сыйлыққа қаражат жиналып жатқан мектептердің аты аталып, айғақ ретінде ата-аналар чатындағы ақша аударымы туралы түбіртектер көрсетілді.

Сонымен қатар, мұғалімдері сыйлықтан бас тартқан мектептер де айтылды.

Атырау қалалық білім беру бөлімі, Облыстық Қоғамдық кеңестің көтерген мәселесі негізінде, Атырау қаласы бойынша мектептерге хат жолдап, ата-аналардан жиналған ақшаны кері қайтару туралы жұмыс жүргізетінін мәлімдеді.

         Қоғамдық кеңес халық наразылығын назарынан тыс қалдырмайды.

 

Атырау Облыстық Қоғамдық кеңесі