Қазкеңес жаңалықтары

Маңызды мәселелер талқыланды

   Аудандық қоғамдық кеңес төрағасы Марат Еспенбетовтің төрағалығымен кеңес отырысы өткізіліп, күн тәртібінде бірнеше маңызды мәселе қаралды. Кеңес төрағасы ең алдымен Мемлекет басшысының Жолдауынан туындаған мақсат-міндеттерге тоқталып, саяси маңызы бар құжаттың басым бағыттары туралы айтып өтті.

   Күн тәртібіндегі бірінші мәселе бойынша аудандық полиция бөлімінің бастығы Н.Ибраевтың есебі тыңдалды. Құқық органының басшысы есепті мерзімде атқарылған жұмыстар мен қылмыстың алдын алу бағытында жоспарланған жұмыстарды баяндады. 

   Мұнан кейін жергілікті бюджеттен қаржыландырылатын «Б» корпусының мемлекеттік әкімшілік қызметшілерінің қызметін бағалаудың әдістемесін бекіту туралы қаулының жобасы талқыланды. Аудан әкімі аппаратының персоналды басқару (кадр қызметі) бөлімінің басшысы М.Жәмиев кеңес мүшелеріне қаулы мен мемлекеттік қызметтегі жаңашылдықтар туралы түсіндірді. Кеңес мүшелері тарапынан сұрақтар қойылып, жауап берілді. 

   Ал күн тәртібіндегі үшінші мәселе әлеуметтік көмек көрсету, оның мөлшерлерін белгілеу және мұқтаж азаматтардың жекелеген санаттарының тізбесін айқындау Қағидаларын бекітуге арналды. Бұл бойынша аудандық мәслихатының 2020 жылғы 16 қыркүйектегі №430 шешіміне өзгеріс пен толықтыру енгізу туралы шешім жобасын аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы М.Қаратаев баяндама жасады. Бөлім басшысы сондай-ақ мүгедектігі бар балаларды жеке оқыту жоспары бойынша аудандық мәслихатының шешім жобасына өзгерістер енгізілетінін айтты. 

   Сонымен қатар аудандық мәслихаттың «Б» корпусы мемлекеттік әкімшілік қызметшілерінің қызметін бағалаудың әдістемесін бекіту туралы қабылданған шешімнің күшін жою жөнінде аудандық мәслихаттың бас маманы А.Сәдуақасов хабарлама жасап, кеңес мүшелерінің сұратарына жауап берді. 

   Қоғамдық кеңес отырысын қорытындыланған М.Еспенбетов ауданның әлеуметтік-экономикалық, қоғамдық-саяси дамуының басым бағыттары туралы пікірін ортаға салып, кеңес мүшелерін тұрғындар игілігі үшін бірлесе еңбек етуге шақырды.