Жылыту маусымы және жаңа ЖЭО: Көкшетау үшін маңызды мәселелер

23 қыркүйекте Көкшетау қаласының Қоғамдық кеңесі қала мәслихатының депутаттарымен және Ақмола облысының Қоғамдық кеңесімен бірлесіп көшпелі отырыс өткізді.

Кездесудің негізгі мәселелері жаңа ЖЭО құрылысының барысы және қаланың коммуналдық инфрақұрылымын 2026–2027 жылдардағы жылыту маусымына дайындау болды.

Көшпелі отырыс барысында қатысушылар ЖЭО құрылысының қазіргі кезеңімен тікелей танысты. Жобаның тапсырыс берушісі – «Көкшетау ЖЭО» ЖШС. Кәсіпорынның бас директоры Мирас Қапарғалиұлы Қияков қатысушыларды құрылыс жұмыстарының барысымен, жобаның техникалық ерекшеліктерімен және оны іске асырудың негізгі кезеңдерімен таныстырды.

Ұсынылған ақпаратқа сәйкес, болашақ ЖЭО-ның жобалық жылу қуаты 820 Гкал/сағ құрайды, ал құрылысты аяқтау 2029 жылдың I тоқсанына жоспарланған. Нысанның жобалаушысы – «Севказэнергопром» ЖШС.

Сондай-ақ қаланы 2026–2027 жылдардағы жылыту маусымына дайындау, жылумен жабдықтау жүйесін дамыту және Көкшетау қаласының жылу желілерінің жағдайы мәселелеріне ерекше назар аударылды. Осы мәселе бойынша «Көкшетау-Жылу» ШЖҚ МКК бас директорының орынбасары Ержигит Ербатырұлы Тұңғатаров ақпарат берді.

Бүгінгі таңда РК-1 және РК-2 бойынша негізгі жөндеу жұмыстары аяқталды. №9 қазандық агрегатының электр сүзгісін ауыстыру жобасы іске асырылуда, сондай-ақ қаланың жекелеген жылу магистральдары учаскелерін қайта жаңғырту жұмыстары аяқталу кезеңінде.

«Энергетикалық және коммуналдық секторларды жаңғырту» ұлттық жобасы аясында ТМ-1 жылу магистралін және РК-2 техникалық су құбырын қайта жаңғырту жобалары жүзеге асырылуда.

Көшпелі отырыс қатысушыларға қаланың маңызды инфрақұрылымдық жобаларының бірінің іске асырылу барысымен тікелей танысуға, жылумен жабдықтаудың өзекті мәселелерін талқылауға және Көкшетау қаласын алдағы жылыту маусымына дайындау бойынша жүргізіліп жатқан жұмыстарды бағалауға мүмкіндік берді.

Фото

Previous Next