Көкшетау қаласы Қоғамдық кеңесінің отырысында денсаулық сақтау саласындағы мәселелер талқыланды

2 қыркүйекте Көкшетау қаласының Қоғамдық кеңесінің кезекті отырысы өтіп, онда қаланың денсаулық сақтау жүйесінің қазіргі жағдайы мен одан әрі даму перспективалары негізгі мәселелердің бірі ретінде талқыланды.

Естеріңізге сала кетейік, 18 тамызда Көкшетау қаласы мен Ақмола облысының Қоғамдық кеңестері мүшелерінің қатысуымен қаладағы медициналық ұйымдардың, оның ішінде қалалық көпбейінді аурухана мен қалалық емхананың қызметіне мониторинг жүргізілген болатын.

Отырыс барысында мониторинг нәтижесінде анықталған проблемалық мәселелер жан-жақты талқыланды. Атап айтқанда, ауруханаларға, әсіресе кешкі және түнгі уақытта түсетін жоғары жүктеме, алғашқы медициналық-санитариялық көмектің қолжетімділігі, пациенттерді дұрыс бағыттау және жоспарлы емдеуге жатқызу мәселелеріне ерекше назар аударылды.

Сонымен қатар медицина ұйымдарын кадрлармен қамтамасыз ету, қаржыландыру, кредиторлық берешек, дәрі-дәрмекпен қамтамасыз ету, медициналық құрал-жабдықтарды сатып алу, скринингтік тексерулер мен вакцинация жүргізу мәселелері қаралды.

Отырысқа қатысушылар азаматтардың өтініштерімен жұмыс істеу жүйесін жетілдіру және медициналық ұйымдар мен тұрғындар арасындағы өзара байланысты нығайтудың маңыздылығын атап өтті.

Отырыс қорытындысы бойынша Қоғамдық кеңес анықталған мәселелерді шешуге бағытталған нақты іс-шаралар, жауапты орындаушылар мен оларды іске асыру мерзімдері көрсетілген жол картасын әзірлеуді ұсынды.

Мәселелерді анықтау ғана емес, оларды нақты шешу маңызды. Осыған байланысты ұсынымдардың орындалуын бақылау және тұрғындармен кері байланысты қамтамасыз ету Қоғамдық кеңес жұмысының маңызды бағыттарының бірі болып қала береді.

Фото

Previous Next