Қазкеңес жаңалықтары

Газдандыру және инженерлік желілерді жаңғырту – Көкшетау қаласының Қоғамдық кеңесінің басты назарында

2026 жылғы 31 шілдеде Көкшетау қаласының Қоғамдық кеңесінің кезекті отырысы өтті.

Отырыс барысында қалалық инфрақұрылымды дамыту және халықтың өмір сүру сапасын арттыру үшін маңызды бірқатар өзекті мәселелер қаралды.

Негізгі мәселелердің бірі тұрғын үй қорын жаңғырту, тұрғын үйлерді табиғи газға қосуға дайындау, сондай-ақ инженерлік желілерді – жылу желілерін, сумен жабдықтау және кәріз жүйелерін, электр желілері мен электр қосалқы станцияларын реконструкциялау мәселесі болды.

Аталған мәселе бойынша Қоғамдық кеңес Көкшетау қаласының тұрғын үй қатынастары және тұрғын үй инспекциясы бөлімінің басшысы ұсынған ақпаратты тыңдады. Талқылау қорытындысы бойынша ұсынылған ақпаратты қосымша нақтылау және толықтыру қажеттігі атап өтілді. Осыған байланысты мәселе Қоғамдық кеңестің бақылауында қалдырылды.

Сонымен қатар отырысқа қатысушылар жер қатынастары, сәулет және қала құрылысы саласындағы мемлекеттік қызметтерді көрсету сапасын арттыру мәселесін талқылады. Тиісті бөлімнің басшысы баяндама жасады. Ұсынылған ақпарат назарға алынды.

Отырыс қорытындысы бойынша Қоғамдық кеңес бірқатар ұсынымдар әзірледі. Атап айтқанда, Көкшетау қаласының әкіміне қаланы табиғи газды қабылдауға дайындау жөніндегі Жол картасын әзірлеп, бекіту, инженерлік және жылу энергетикасы инфрақұрылымын кешенді түрде дайындау, сондай-ақ Қоғамдық кеңестің газдандыру мәселелері бойынша бұған дейін жолдаған ұсынымдарын қарау ұсынылды.

Сонымен қатар Ақмола облысының энергетика және тұрғын үй-коммуналдық шаруашылық басқармасына Көкшетау қаласын табиғи газбен газдандыру жобасының іске асырылу барысы туралы өзекті ақпарат алу мақсатында тиісті сұрау жолдау туралы шешім қабылданды.

Қаланың инженерлік инфрақұрылымының жұмысын қамтамасыз ететін ұйымдарға нысандардың қазіргі жағдайы, оларды жаңғырту және дамыту жоспарлары, қаржыландыру көздері, сондай-ақ аталған жобаларды іске асыру шеңберіндегі мемлекеттік бағдарламалар мен қаржыландырудың өзге де тетіктері туралы ақпарат алу үшін жеке сұрау хаттар жолданатын болады.

Қоғамдық кеңес Көкшетау қаласындағы газдандыру, коммуналдық инфрақұрылымды жаңғырту және мемлекеттік қызметтерді көрсету сапасын арттыру мәселелерін бақылауда ұстауды жалғастырады.

Фото