САТПАЕВ - МАЛШЫБАЙ ЖОЛЫ: ЖАУАПКЕРШІЛІК КІМДЕ?

Сатпаев қаласынан Малшыбай ауылына апаратын жолдың қазіргі жағдайы - жай ғана жол мәселесі емес. Бұл - қауіпсіздік, әділеттілік және жауапкершілік мәселесі.

Жолдың кей тұстары ойылып, асфальт қабаты бұзылған. Күн сайын осы жолмен ауыл тұрғындары, қарапайым азаматтар қатынайды. Демек, жолдың жағдайы ең алдымен адамдардың қауіпсіздігіне әсер етеді. Бүгін осы бағытта Ұлытау облысы Қоғамдық кеңесінің төрағасы Бауыржан Бегенов пен облыстық кеңес мүшелері Аяна Мүкеева, Айтболат Ахмет бақылау жұмыстарын жүргізіп, жағдайды көзбен көріп қайтты.

Енді мәселенің екінші жағына назар аударайық. Бұл бағытта <<Қазақмыс>> корпорациясына тиесілі ауыр жүк көліктері тұрақты қатынайды. Ауыр техниканың қозғалысы жолға түсетін салмақты бірнеше есе арттыратыны белгілі. Сондықтан, заң аясында тиісті сараптама жүргізіліп, жолдың тозуына кім және қаншалықты әсер етіп отырғаны нақты анықталуы керек. <<Қазақмыс>> - Ұлытау өңірі үшін маңызды компания. Мыңдаған адам еңбек етеді. Компания өңір экономикасына үлес қосып, әлеуметтік жобаларды жүзеге асырып келеді. Мұны бағалауымыз қажет. Бірақ, үлкен компания болу - үлкен жауапкершілікті де талап етеді. Егер, кәсіпорынның өндірістік қызметі белгілі бір жолға айтарлықтай салмақ түсірсе, сол жолдың жағдайына жауапкершілікпен қарау - компанияның әлеуметтік міндетінің бір бөлігі болуы тиіс. Мемлекеттік бюджет - шексіз қаржы емес.

Егер, бір компанияның ауыр техникалары жолды тұрақты пайдаланса, кейін сол жолды жөндеуге қажетті миллиондаған қаражатты толықтай мемлекет көтеруі қаншалықты әділетті? Мәселе дәл осы жерде. Сондықтан, <<Қазақмыс>> корпорациясына ұсыныс:

1) осы жолдың техникалық жағдайына тәуелсіз сараптама жасату;

2) ауыр техникалардың жолға түсіретін нақты жүктемесін бағалау;

3) жолды күтіп ұстауға және жөндеуге компания тарапынан қаржылай қатысу мүмкіндігін қарастыру.

Бұл - талап қою үшін талап қою емес. Бұл - мемлекет пен бизнестің өзара жауапкершілігін қалыптастыру мәселесі. Инвестордың ірілігі тек өндіріс көлемімен өлшенбейді. Нағыз ірілік - өзің жұмыс істеп отырған өңірдің проблемасына бейжай қарамау. Мемлекет кәсіпкерлікке жағдай жасайды. Кәсіпкерлік салық төлейді, жұмыс орындарын ашады, экономикаға үлес қосады. Бірақ, қарым-қатынас біржақты болмауы керек. <<Өңір бізге не береді?>> деген сұрақпен қатар, <<Біз осы өңірге не беріп жатырмыз?>> деген- сұрақ та тұруы қажет. Сатпаев - Малшыбай жолы  соның нақты бір мысалы. Егер, жолға түсетін салмақтың елеулі бөлігі өндірістік ауыр техникалардан болса, онда оның жөндеуіне мемлекетпен бірге сол жүктемені қалыптастыратын компания да өз үлесін қосуы керек. Бұл - сын емес. Бұл - жауапкершілік туралы мәселе.

Фото

Previous Next