Қоғамдық кеңесте білім саласының өзекті мәселелері қаралды

Ағымдағы жылдың 20 тамыз күні Маңғыстау облысы Қоғамдық кеңесінің кезекті отырысы кеңес төрағасы Жүсіпов Бекмұрат Қыдырбайұлының төрағалығымен өтті.

Күн тәртібіндегі негізгі мәселе бойынша Маңғыстау облысының білім басқармасы басшысы Амантай Ясавилұлы Кумбаевтың 2026–2027 оқу жылына дайындық туралы есебі тыңдалды.

Отырыста өңір үшін маңызды бірқатар мәселелер қаралды. Атап айтқанда, 2026–2027 оқу жылына дайындық барысы, білім беру ұйымдарының материалдық-техникалық жағдайы, оқушыларды оқулықтармен және тегін ыстық тамақпен қамтамасыз ету, мектептердегі қауіпсіздік шаралары, кадр мәселесі, сондай-ақ техникалық және кәсіптік білім беру саласының жай-күйі талқыланды.

Жаңа оқу жылында облыста 742 білім беру ұйымы жұмысын бастайды. Оның ішінде 214 мектепте 200 мыңға жуық оқушы білім алуы жоспарланған. Сонымен қатар мектепке дейінгі ұйымдарда қосымша орындар ашу, білім беру нысандарын жөндеу, жылу маусымына дайындық және оқушылардың қауіпсіздігін қамтамасыз ету бағытында жұмыстар жүргізілуде.

Отырыста білім беру саласындағы өзекті мәселелер бойынша пікірлер айтылып, тиісті ұсыныстар берілді.

Маңғыстау облысының Қоғамдық кеңесі өңір тұрғындарының мүддесін ескере отырып, әлеуметтік маңызы бар мәселелерді талқылау және олардың шешілуіне ықпал ету бағытындағы жұмысын жалғастырады.

Фото

Previous Next