Маңғыстау облысының Қоғамдық кеңесінде облыстық бюджетті нақтылау мәселесі қаралды

2026 жылғы 13 тамызда Маңғыстау облысының Қоғамдық кеңесінің отырысы кеңес төрағасы Жүсіпов Бекмұрат Қыдырбайұлының төрағалығымен өтті.
Кеңес отырысына облыстық басқармалардың басшылары мен жауапты мамандары қатысты.
Күн тәртібінде 2026 жылға арналған облыстық бюджетті нақтылау туралы шешім жобасы қаралды.
Маңғыстау облысының экономика және бюджеттік жоспарлау басқармасының басшысы Тілеген Едігеұлы Едігеев облыс бюджетінің ағымдағы жағдайы, кірістер мен шығыстар бойынша жүргізіліп жатқан жұмыстар және бюджет қаражатын басым бағыттарға қайта бөлу мәселелері туралы ақпарат берді.
Сонымен қатар, жыл соңына дейін бюджет кірістерінің орындалмау тәуекелдері бар екені айтылды. Осыған байланысты облыс әкімдігі мен кірістер департаменті тарапынан өңірде қызмет ететін мекемелерді тіркеу бойынша жұмыстар жүргізілуде.
Қаражатты қайта бөлу барысында әлеуметтік маңызы бар салаларға ерекше назар аударылған. Атап айтқанда, денсаулық сақтау саласында Мұнайлы аудандық ауруханасының кредиторлық берешегін ішінара өтеуге 150 млн теңге қарастыру ұсынылды.
Мәдениет және спорт салаларында мемлекеттік шығармашылық және спорттық тапсырыстарды жүзеге асыруға 3,3 млрд теңге қаражат жоспарланған. Бұл қаражатпен шамамен 25 мың бала мен жасөспірімді қамту көзделіп отыр.
Отырыс барысында өңірдің энергетикалық және коммуналдық инфрақұрылымын жаңғырту мәселелері де қозғалды.
Отырыс қорытындысы бойынша Қоғамдық кеңес мүшелері 2026 жылға арналған облыстық бюджетке енгізілетін өзгерістерді қарап, тиісті пікірлері мен ұсыныстарын білдірді.

Фото

Previous Next