Жасыл желектерді цифрлық есепке алу

Астана қаласының Қоғамдық кеңесі кезекті отырысында тұрақты бақылауда тұрған мәселелердің бірі – жасыл желектерді цифрландыру және паспорттандыру мәселесін қарастырды.

Астана қаласының Қоршаған ортаны қорғау және табиғатты пайдалану басқармасының басшысы Дәулет Досқұлов 2023 жылы «Астанагенплан» ЖШС әзірлеген «Көгалдандыру тұжырымдамасы» негізінде жүзеге асырылып жатқан елорда аумағын кешенді абаттандыру және көгалдандыру жұмыстарының нәтижелері туралы баяндады.

Мәселені қарастыру аясында Қоғамдық кеңес мүшелері «Тұңғыш Президент» скверін, «Ататүрік» және «Жерұйық» саябақтарын аралап шықты. Аралау қорытындысы бойынша олар атқарылып жатқан жұмыстар жаңа көшеттерді отырғызуды жоспарлауға, жұмыстардың сапасын бақылауға және қалалық ортаны дамытудың басым бағыттарын айқындауға мүмкіндік беретінін атап өтті.

Сонымен қатар Қоғамдық кеңес мүшелері бірқатар проблемалық нысандарды да көтерді. Солардың бірі – 1962 жылы құрылған және қайта жаңғыртуды қажет ететін Орталық саябақ аумағындағы Дендросаябақ.

Сондай-ақ отырыста Астана қаласы әкімдігінің инфрақұрылымдық және бюджеттік-инвестициялық жобалар аясында көгалдандыру жұмыстарын жүргізетін құрылымдық бөлімшелерінің отырғызылған жасыл желектер туралы мәліметтерді «Елорданың жасыл желектер тізілімі» порталына уақтылы енгізбеуі мәселесі көтерілді.

Дәулет Досқұлов сондай-ақ «Таза Қазақстан» экологиялық мәдениетті дамыту тұжырымдамасын іске асыру жөніндегі 2024–2029 жылдарға арналған өңірлік іс-қимыл жоспарына өзгерістер енгізу жобасын таныстырды. Ұсынылған түзетулер экологиялық ахуалды жақсартуға бағытталған кешенді тәсілді көздейді. Атап айтқанда, экологиялық ағарту жұмыстарын күшейту, жастардың қатысуымен экологиялық білім беруді дамыту, бұқаралық ақпарат құралдары мен әлеуметтік желілерде экологиялық бастамаларды кеңінен насихаттау және экологиялық инфрақұрылымды жетілдіру қарастырылған.

Қоғамдық кеңес мүшелері әлеуметтік сала мәселелеріне де ерекше назар аударды. Астана қаласының Жұмыспен қамту және әлеуметтік қорғау басқармасының басшысы Ерлан Жүсіпов елордада тұрғылықты жері және уақытша болатын жері бойынша тіркеу нормативтерін бекіту туралы әкімдік қаулысының жобасын таныстырды.

Ал Астана қаласының Көлік және жол-көлік инфрақұрылымын дамыту басқармасының басшысы Асхат Қарағойшин әлеуметтік маңызы бар автобус маршруттарының тізбесін кеңейту жөніндегі ұсыныстарды таныстырды. Қоғамдық кеңес мүшелері қолданыстағы мәслихат шешіміне енгізілетін толықтыруларды қарап, олардың қала шетін орталықпен байланыстыратын маңызды автобус бағыттарын субсидиялау мен дамытуға оң ықпал ететінін атап өтті.

Өз кезегінде Астана қаласы әкімі аппараты басшысының орынбасары Тимур Мусин алдағы мәслихат депутаттарының сайлауы кезеңінде үгіт материалдарын орналастыру орындарын айқындау туралы әкімдік қаулысына енгізілетін өзгерістерді таныстырды. Бұл өзгерістер сайлау науқанының ашықтығы мен ұйымдастырылуын қамтамасыз етуге бағытталған.

Күн тәртібіне енгізілген нормативтік-құқықтық актілердің барлық жобалары жан-жақты қаралды. Қоғамдық кеңес мүшелері қабылданатын өзгерістер елордадағы мемлекеттік органдар жұмысының ашықтығын арттырып, Астананың әлеуметтік, инфрақұрылымдық және экологиялық дамуына оң серпін береді деген пікір білдірді.

Фото

Previous Next