Маңғыстау облысы Қоғамдық кеңесінің отырысында балық шаруашылығы мен инвестициялық жобалардың жүзеге асырылу барысы қаралды

Ағымдағы жылдың 2 шілде күні Маңғыстау облысы Қоғамдық кеңесінің төрағасы Бекмұрат Қыдырбайұлы Жүсіповтің төрағалығымен Маңғыстау облысы Қоғамдық кеңесінің кезекті отырысы өтті.

Жиынға облыстық басқармалар мен мекемелердің басшылары, қоғамдық кеңес мүшелері және жауапты сала өкілдері қатысты.

Күн тәртібінде Маңғыстау облысының балық шаруашылығы саласын дамыту, өңірге инвестиция тарту, әлеуметтік-кәсіпкерлік жобаларды іске асыру және мемлекеттік қолдау бағдарламаларының орындалу барысы қаралды.

Алғашқы мәселе бойынша Маңғыстау облысының Балық шаруашылығы басқармасы өңірде атқарылып жатқан жұмыстар мен алдағы жоспарлар жөнінде баяндама жасады.

Баяндама барысында Маңғыстау облысында балық шаруашылығын дамытуға бағытталған кешенді жұмыстар жүзеге асырылып жатқаны атап өтілді. Оның ішінде кәсіпшілік балық аулау көлемін ұлғайту, теңіздегі аквашаруашылықты дамыту, ғылыми-зерттеу жұмыстарын кеңейту, нормативтік-құқықтық базаны жетілдіру және салалық инфрақұрылымды қалыптастыру мәселелеріне ерекше назар аударылып отырғаны айтылды.

Сондай-ақ облыста «Organic Fish», «Red Pearl», «Caspian Sturgeon Ecological Development Co., Ltd.» және «Caspian Seafood» компанияларының қатысуымен жалпы инвестиция көлемі 32 млрд теңгеден асатын ірі жобаларды жүзеге асыру жоспарланғаны баяндалды. Аталған жобалар іске асқан жағдайда өңірде жылына 6 мың тоннадан астам албырт және бекіре тұқымдас балық өсіріліп, 200 тоннадан астам тағамдық қара уылдырық өндіру мүмкіндігі қалыптасады.

Сонымен қатар ғылыми зерттеулер нәтижесінде теңіздегі аквашаруашылыққа арналған жаңа учаскелер анықталып, Каспий теңізінің табиғи балық қорын молайту, бағалы балық түрлерін сақтау және кәсіпшілік ресурстарды ғылыми негізде басқару бағытындағы жұмыстар жалғасатыны айтылды.

Келесі мәселе бойынша «Каспий» әлеуметтік-кәсіпкерлік корпорациясы» АҚ өңірде жүзеге асырылып жатқан инвестициялық жобалар туралы есеп берді.

Аталған жобаларды жүзеге асыру нәтижесінде 367-ден астам тұрақты жұмыс орнын ашу жоспарланған.

Жиында форель өсіру және балық өңдеу кешені, құрғақ түйе сүтін өндіретін зауыт, наноқант технологиясымен сироп өндіру цехы, заманауи курорттық кешендер, глэмпинг жобасы, көлік-логистикалық орталық, сондай-ақ халықаралық «TACTIC CENTER» зияткерлік ойындар орталығы секілді ірі инвестициялық жобалардың іске асырылу барысы таныстырылды.

Сонымен қатар «Ауыл аманаты» бағдарламасының орындалу нәтижелері де қаралды. Бүгінгі күні оның аясында 80 жобаға қаржылай қолдау көрсетілген.

Отырыс барысында Қоғамдық кеңес мүшелері баяндамалар бойынша өз ұсыныстары мен пікірлерін білдіріп, салаларды одан әрі дамытуға қатысты бірқатар мәселелерді көтерді.

Жиын қорытындысында көтерілген мәселелер бойынша тиісті ұсыныстар әзірленіп, жауапты мемлекеттік органдарға нақты тапсырмалар берілді.

Фото

Previous Next