Қоғамдық кеңесте 2025 жылға арналған облыстық бюджеттің атқарылуы қаралды

Булат Құспековтың төрағалығымен өткен облыстық қоғамдық кеңестің экономика, бюджет және құрылыс мәселелері жөніндегі комиссиясының отырысында 2025 жылға арналған бюджеттің атқарылуы қаралды. Отырысқа қатысушылар облыстың қаржы басқармасының басшысы Жеңіс Шақатовтың кірістердің түсімі, бюджетті игеру, білім беру, денсаулық сақтау, құрылыс және халықты әлеуметтік қорғау салаларындағы негізгі бағдарламалардың орындалу барысы туралы баяндамасын тыңдады. Облыстық бюджеттің кірісі 102,3 млрд теңгені құрды, жоспарлы көрсеткіш 96,9 млрд теңге. Бюджеттің орындалуы 105,5 пайызды құрап, 5,4 миллиард теңгеге артығымен орындалды. Салық түсімдері 103,9 пайызға, салықтық емес түсімдер 127,6 пайызға орындалды. Негізгі өсім қоршаған ортаға теріс әсер еткені үшін төлемдер, әлеуметтік және табыс салығы, айыппұлдар есебінен болды. Шығыстар 99,2 пайызға орындалды: 514 миллиард теңгенің 510,1 миллиард теңгесі орындалды. 3,9 миллиард теңгенің атқарылмауына республикалық бюджеттен қаржының жетіспей түсуі, мемлекеттік сатып алулар бойынша үнемдеу, құрал-жабдықтарды жеткізу мерзімдерінің кешіктірілуі себеп болып отыр. Отырыс қорытындысы бойынша комиссия қаражатты жергілікті игерілуінің бақылауын күшейтуді, жүзеге асырылып жатқан жобаларды іске асыруды жеделдетуді, бюджеттік рәсімдердің ашықтығын арттыруды ұсынды.

Фото

Previous Next