112 - бірыңғай кезекші-диспетчерлік қызметі - «EDDS-112» - пилоттық жобасының Қызылорда облысында жүргізілу барысы талқыланды

---

2016 жылдан бастап Қызылорда қаласында Жедел жәрдем станциясының базасында «Көмек» ақпараттық жүйесін (Көмек-103, Көмек-112, Көмек-109) кезең-кезеңімен енгізу қолға алынды. Үкімет тапсырмасымен 2018 жылдың қараша айынан бастап «Қауіпсіздік саласын цифрландыру» бағыты бойынша Нұр-Сұлтан қаласы мен Қызылорда облысында пилоттық жоба іске қосылды. Жоба аясында Қызылорда облысында «Бірыңғай кезекшілік-диспетчерлік қызмет – 112» жүйесі іске қосылды.  

            Жобаның мақсаты – тұрғындардың қорғалуы мен қауіпсіздігін қамтамасыз ету, жедел қызметтердің шақырулар бойынша өзара іс-қимылын дұрыс үйлестіру, төтенше жағдайларды жоюда кешенді әрекет ету уақытын қысқарту, ТЖҚ-нің  ресурстарын ұтымды бөлу және пайдалану. 

            2020 жылы 25 маусымда «Қ.Р. кейбір заңнамалық актілеріне цифрлық технологияларды реттеу мәселелері бойынша өзгерістер мен толықтырулар енгізу туралы»  Заңға цифрлық технологияларды реттеу бойынша түзетулер қабылданды.

            «Заң жобасын екінші оқылымға әзірлеу барысында бес облыста «112» бірыңғай кезекшілік-диспетчерлік қызметінің пилоттық жобаларын іске асыру барысына талдау жасалып, қалған өңірлердің осы қызметті жүзеге асыруға дайындығы мәселесі қаралды. Жергілікті атқарушы органдардың толық дайын еместігін көрсеткен жұмыстардың қорытындысы бойынша және дайындық шараларын қамтамасыз ету мақсатында бірыңғай кезекшілік қызметін енгізу  мерзімі 2023 жылға ауыстырылды». 

            Дегенмен  бұл  жобада  әлі де кемшіліктер  көп:

            - Пилоттық  жоба  «EDDS-112»  ешқандай  тұжырымдамасыз  және жоспарсыз  дайындалған. 

            - Әмбебап  диспетчерлер дайындау, оқыту қарастырылмаған. 

             - Жоба бір компанияға беріліп, балама таңдау қарастырылмаған.

            - Жобаны құру, басқару әр  облысқа  беріліп, бір  бағдарламаны 20 түрлі келісім-  шартпен іске асыруда. 

            - Жобаға қатысты  министрліктер арасында  үйлестіру жоқ.

             - Әзірлеуші  компанияның  қызмет көрсету бөлімі дұрыс жауап бермейді және ақауларды жойып  отырған  жоқ. 

            - GPS навигациясы жұмысы талапқа сай  емес. 

            - Диспетчерлік қызметке мемлекеттік, жеке, банктік, коммерциялық құпия  мәліметтердің ақпаратын сақтауда заң бұзылған. 

     - Жобаның 4 жылында  бірде-бір есеп құжаттамасы жоқ, яғни  одан әрі  республикалық көлемде  енгізу күмән  тудырады. 

         Қызылорда облысының Қоғамдық кеңесінің экономика, инновациялық даму және кәсіпкерлік мәселелері жөніндегі комиссиясының жүргізген  сараптамасы  аясында және облыстағы осы жобаға қатысы бар басқармалар мен Қызылорда, Атырау облысы жедел жәрдем қызметтері басшылығы, Парламент мәжілісі депутаттары мен осы жобаға қатысы бар министрліктердің вице-министрлерінің онлайн қатысуымен өткен талқылау қорытындысымен «Қазақстан Республикасы кейбір заңнамалық актілеріне цифрлық  технологияларлы реттеу мәселелері бойынша өзгерістер мен  толықтырулар  енгізу  туралы» Қ.Р 2020 жылғы 25 маусымдағы №347-V1 ҚРЗ Заңының үшінші оқылымына  ұсыныстар берілді.