Қазкеңес жаңалықтары

МЕРКІ АУДАНЫНЫҢ ӘЛЕУЕТІ ЖОҒАРЫ. ЖАМБЫЛ ОБЛЫСТЫҚ ҚОҒАМДЫҚ КЕҢЕСІ МЕРКІ АУДАНЫНА ҚОҒАМДЫҚ БАҚЫЛАУ ЖҮРГІЗДІ

Меркі ауданына жоспарланған қоғамдық бақылау барысында облыстық Қоғамдық кеңес құрамын аудан әкімі Ербол Жиенқұлов қабылдады.

Аудан әкімі тарихы терең, табиғаты таңғажайып өлке - Меркі ауданының әлеуметтік-экономикалық даму көрсеткіштеріне тоқталып, өнеркәсіп, кәсіпкерлік және туризм, инвестиция тарту, ауыз су және газ, кәріз жүйелері, жолдарды жөндеу, әлеуметтік және мәдени бағыттарда жүзеге асырылатын ауқымды жобалар ауданның әлеуетін көтеретінін жеткізді.

Аудан әкімдігінің мәжіліс залында жиналған тұрғындарды, мемлекеттік органдар қызметкерлерін Меркі аудандық Қоғамдық кеңесінің төрағасы Жұмахан Жантелиев мониторингтік топ құрамымен таныстырды.

Қоғамдық кеңестің әлеуметтік салалар жөніндегі комиссиясының төрағасы Сұлушаш Құрманбекова ҚР “Қоғамдық кеңестер туралы” Заңына сәйкес кеңестің мақсаты қоғамдық маңызды мәселелер бойынша азаматтық қоғамның пікірін білдіру болып табылатынын атап өтіп, қоғамдық бақылаудың міндеттері және бақылау нысандары туралы баяндап берді.

Жамбыл облысы бойынша транплантолог-үйлестіруші, бас нефролог Аягөз Баймуратова кездесуге қатысушыларға ағза донорлығы туралы толық ақпарат беріп, елімізде трансплантологияны дамыту мәселелері туралы мазмұнды түсіндіру жұмысын жүргізді.

Қоғамдық бақылау барысында Меркі аудандық көпбейінді орталық ауруханасының ұжымымен кездесіп, топ мүшелеріне қолданысқа жаңадан берілген қабылдау бөлімінің медициналық-санитариялық алғашқы көмек қызметі таныстырылды.

Науқастарды тіркеу, алғашқы медициналық тексеру, санитарлық өңдеу және шұғыл көмек көрсету мақсатында Triage жүйесі енгізілген аурухананың қабылдау бөлімі ультрадыбыстық сенсорлық құрылғылармен жабдықталып, сапалы медициналық қызмет көрсетеді.

№9 Меркі колледжінің материалдық-техникалық базасы жаңғыртылып, заманауи колледж базасы ретінде өңірлік IT HUB орталығы ашылған. Орталықта IT- мамандары, техникалық мамандар, цифрлық индустрия бизнесмендері өз құзыреттерін арттыра алады. Колледж директоры, іскер басшы Ғалымжан Мамырбаевтың айтуынша, жергілікті кәсіпкерлердің қолдауымен ашылған оқу шеберханалары, оқу шаруашылықтары мамандар даярлау сапасын арттырып, соңғы 3 жылда түлектердің жұмысқа орналасу үлесі 75-80 пайызға жеткен.

Қоғамдық бақылау нәтижесі көрсеткендей, Меркі ауданында әлеуметтік бағыттарда жүзеге асырылатын ауқымды жобалар қоғамның дамуына тікелей ықпал ететіні анық.

Фото