Қазкеңес жаңалықтары

ЖАМБЫЛ ОБЛЫСТЫҚ ҚОҒАМДЫҚ КЕҢЕСІ МОЙЫНҚҰМ АУДАНЫНА ҚОҒАМДЫҚ БАҚЫЛАУ ЖҮРГІЗДІ

Облыстағы жер көлемінің 42 пайызын алып жатқан жайлауы кең, қойнауы табиғат байлығына тұнған Мойынқұм ауданында облыстық Қоғамдық кеңестің мониторингтік тобы қоғамдық бақылау жүргізді.

Қоғамдық кеңестің білім, денсаулық сақтау, мәдениет, спорт, жастар саясаты және қоғамдық даму жөніндегі комиссиясының төрағасы Сұлушаш Құрманбекованың жетекшілігімен мониторингтік топ мүшелері Ә.Зәуірбеков, Б.Дәуренбеков, Ж.Орынбаева және комитет мүшелері Мойынқұм аудандық мәслихатының мәжіліс залында азаматтық қоғам өкілдерімен кездесті.

Топ мүшелері жоспарға сәйкес мемлекеттік органдардың, оның ішінде ауданның денсаулық сақтау, техникалық және кәсіптік білім, сәулет және құрылыс, автомобиль жолдары және жолаушылар көлігі салаларының мемлекеттік қызметтер көрсетуі, стратегиялық жоспарларды, бюджеттік бағдарламаларды іске асырылуы нәтижесінде азаматтар үшін жағымсыз салдарлар және қоғамдық мүдделерге нұқсан келтіру фактілерін анықтау мақсатында жүргізілетін қоғамдық бақылау міндеттерін түсіндірді.

ҚР Мәдениет және ақпарат министрлігі және Денсаулық сақтау министрлігінің Қоғамдық кеңестерге өңірлік денсаулық сақтау басқармаларының транплант-үйлестірушілерін тарта отырып, ағза донорлығын дамыту, донорлық жүйеге деген азаматтардың сенімін арттыру жөнінде жұмыс жүргізу туралы ұсынылған хаттамалық тапсырмасына сәйкес Жамбыл облысының өңірлік трансплантолог- үйлестірушісі Аягөз Баймуратова

“Трансплантологияны дамыту мәселелері туралы” ақпараттық-түсіндіру жұмысын кездесуге қатысушылар арасында кеңінен жүргізіп, қойылған сұрақтарға толық жауаптар берді.

Топ мүшелері қоғамдық бақылау жүзеге асырылатын мекемелердің қызметтеріне қатысты азаматтық қоғам өкілдерінің өтініш- сұрақтарын тыңдап, қоғамдық қабылдау өткізді.

Мойынқұм аудандық орталық ауруханасының қызметтеріне жүргізілген қоғамдық бақылау барысында бас дәрігер Бағлан Жүнісбеков тұрғындарға медициналық көмек талаптарға сай көрсетілетінін баяндады. Алайда, аурухана басшылығы тарапынан ағымдық жөндеу жұмыстары, абаттандыру жұмыстары үнемі жүргізілуіне қарамастан ғимараты ескірген аурухананың ұзақ уақыт бойы күрделі жөндеуден өтпеуі, дәрігер мамандардың жетіспеушілігі салдарынан индикаторлық көрсеткіштерді орындап, сапалы қызмет көрсетуде қиындықтар туындап отырғанын топ мүшелерінің назарына жеткізілді.

№8 Мойынқұм колледжін 2024-2025 жылдары аяқтаған түлектердің жұмысқа орналасуын зерделеу барысы көрсеткендей, “Ауыл шаруашылығын механикаландыру”, “Дәнекерлеу ісі”, “Электромонтер” бағдарламалары бойынша 2 жылда колледжді аяқтаған 55 түлектің барлығы электрондық еңбек биржасы арқылы жұмыссыз ретінде тіркеліп, жастар практикасымен жұмысқа орналасуға 1 ғана шаруашылыққа - “Асқар” шаруа қожалығына жолдамамен жіберілген.

Колледж директоры Айгүл Наушабекованың айтуынша, 260 орындық типтік ғимаратта орналасқан оқу орнында биыл 4 мамандық бойынша 93 бала білім алуда, оның ішінде 25 түлек оқуды аяқтайды.

ҚР Үкіметінің Қаулысымен бекітілген

“Мектепке дейінгі, орта білім, техникалық және кәсіптік білімді дамытудың 2023-2029 жылдарға арналған тұжырымдамасын” басшылыққа алып, колледжге жұмысшы кадрларды даярлайтын негізгі буын ретінде жұмысқа орналастыру міндеттемесімен кәсіпорындардың өтінімдері бойынша жұмысшы кадрларды даярлау туралы нысаналы индикаторды орындау ұсынылды.

Облыстық Қоғамдық кеңестің мониторингтік тобының Мойынқұм ауданында қоғамдық бақылау нысандарын жүргізуіне аудандық Қоғамдық кеңестің төрағасы Сағынғали Аманов қатысып, ұйымдастырушылық-ақпараттық көмек көрсетті.

Фото