ҚР Туризм және спорт министрлігі Қоғамдық кеңесінің кезекті отырысы өтті

Қазақстан Республикасы Туризм және спорт министрлігінде Қоғамдық кеңестің кезекті отырысы өтті. Отырыс барысында 2026 жылғы қысқы Олимпиада және Паралимпиада ойындарына ұлттық құрамаларды даярлау, туризм саласындағы заңнаманы жетілдіру, сондай-ақ Қоғамдық кеңес ұсынымдарының орындалуы мәселелері қаралды.

Спорт және дене шынықтыру істері комитеті төрағасының орынбасары Нұрлан Есембаевтың айтуынша, ХХV қысқы Олимпиада ойындары 2026 жылғы 6–22 ақпан аралығында Италияның Милан және Кортина-д'Ампеццо қалаларында өтеді. Қазақстан 10 спорттық дисциплина бойынша қатысуды жоспарлап отыр, онда 116 медаль жиынтығы сарапқа салынады. Ұлттық құраманың құрамына 35 спортшы енеді.

Дайындық аясында қысқы спорт түрлері бойынша ұлттық құрамалар 188 оқу-жаттығу жиынын өткізіп, 125 халықаралық жарысқа қатысты.

Сондай-ақ туристік инфрақұрылымның бірыңғай стандартын әзірлеу және аккредиттелген спорт федерацияларының қызметін бағалау үшін KPI жүйесі мен әдістемесін қалыптастыру мәселелері қаралды.

Туризм индустриясы комитеті төрағасының орынбасары Айдын Қапашев Қоғамдық кеңес мүшелеріне бірқатар стратегиялық құжаттардың жобаларын таныстырды: 2025–2028 жылдарға арналған Туризмді дамыту жөніндегі жол картасы, 2025–2029 жылдарға арналған «Маңғыстау» туристік аймағын дамыту жөніндегі кешенді жоспар, Щучинск-Бурабай курорттық аймағын дамыту жөніндегі кешенді жоспар, сондай-ақ келісу сатысындағы Алматы тау кластеріндегі туризмді дамыту жөніндегі кешенді жоспар.

Туризмді дамыту жөніндегі жол картасы 5 бөлімнен тұрады және туристік инфрақұрылымды дамытуға, туристер үшін қолайлы жағдай жасауға бағытталған 141 іс-шараны қамтиды. Қазіргі таңда туризм саласы 50-ден астам нормативтік стандарттармен, сондай-ақ 160-тан астам ұлттық және мемлекетаралық инфрақұрылымдық стандарттармен, техникалық регламенттермен және құрылыс нормаларымен реттеледі.

Стратегиялық жоспарлау және жобалық басқару департаментінің директоры Жанат Бейсембин Қоғамдық кеңес ұсынымдарының орындалуы бойынша жыл қорытындысын ұсынды. 2025 жылы 4 отырыс өткізіліп, оның қорытындысы бойынша 38 ұсыным әзірленді (оның ішінде 22-сі – туризм саласында, 16-сы – спорт саласында). Барлық ұсынымдар пысықталды, бір бөлігі орындалды.

Сонымен қатар аккредиттелген спорт федерацияларының қызметін бағалауға арналған KPI жүйесі Қазақстан Республикасы Президенті Әкімшілігі Басшысының 2025 жылғы 18 тамыздағы тапсырмасын орындау аясында әзірленгені атап өтілді. Әдістеме жобасы 9 қазанда республикалық спорт федерацияларына таныстырылып, ұсыныстар енгізу үшін жолданды.

Фото

Previous Next