ҚР Туризм және спорт министрлігі Қоғамдық кеңесінің кезекті отырысы өтті

Қазақстан туризм мен спорт саласында қарқынды даму жолында.
Спорт ардагерлері – басты назарда.

Қазақстан Республикасының Туризм және спорт министрлігінде Қоғамдық кеңестің отырысы өтті, онда спорт ардагерлерін қолдау, мемлекеттік қызметшілердің этикалық стандарттарын нығайту және туризм саласындағы нормативтік-құқықтық базаны жетілдіру сияқты негізгі бағыттар талқыланды.

Спорт және дене шынықтыру істері комитеті төрағасының орынбасары Аманбай Нұруханбетов өңірлердегі ардагерлер қозғалысының жағдайы мен қолдау шаралары туралы баяндама жасады. Бүгінде «Қазақстан спорт ардагерлері одағы» құрамында 1082 ардагер бар. Олар форумдар мен турнирлерге, қоғамдық жобаларға белсене қатысып, өз тәжірибесін жастармен бөлісіп, жан-жақты қолдау табуда.

Отырысқа қатысушылар арасында Олимпиада чемпионы Юрий Мельниченко, спорт журналисі әрі Қазақстан спорт ардагерлері одағы төрағасының бірінші орынбасары Несіп Жүнісбаев, сондай-ақ Одақтың өңірлік филиалдарының басшылары қатысты. Олардың қатысуы талқыланған тақырыптардың маңыздылығын айқындап, қатысушыларға ерекше серпін берді.

Туризм индустриясы комитетінің төрағасы Нұртас Кәріпбаев туризмді дамытудағы жаңа қадамдар туралы баяндап, бизнеске мемлекеттік қолжетімділікті жеңілдету, «жасыл» туризмді енгізу, ерекше қорғалатын табиғи аумақтардағы инфрақұрылымды жақсарту, туристердің қауіпсіздігін арттыру және кәсіпкерлердің құқықтық қорғалуын күшейту бағыттарын атап өтті.

Щучинск-Бурабай және Маңғыстау туристік аймақтарын дамытуға арналған кешенді жоспарлар аясында цифрландыру, туристік өнімдерді ілгерілету және жаңа жұмыс орындарын құру бойынша жобалар іске асырылуда. Бұл шаралар өңірлердің инвесторлар мен туристер үшін тартымдылығын арттыруға бағытталған. Сонымен қатар, Алматы тау кластерін дамыту жөніндегі кешенді жоспар жобасы әзірленіп, оның аясында туристік ағынның ұлғаюы, инвестициялық тартымдылықтың артуы және өңірлік экономиканың дамуы күтілуде.

Мемлекеттік қызметшілердің этикасына ерекше назар аударылады. Министрлік үнемі түсіндіру іс-шараларын, сауалнамалар мен профилактикалық тренингтер өткізеді. Әдеп жөніндегі уәкіл Тұрар Ақшаабаев атап өткендей, әдеп кодексі нормалары жоғары деңгейде сақталады, қызметкерлерді оқыту, ұжымның моральдық-психологиялық ахуалына мониторинг және талдау жүйелі түрде жүргізіледі. Бұл шаралар корпоративтік құндылықтарды нығайтуға және мемлекеттік қызметтің беделін арттыруға ықпал етеді.

Фото

Previous Next