2025–2026 жылдардағы жылыту маусымына дайындық жұмыстарының орындалуын бақылау

30 шілдеде кеңес мүшелері Қ.Рахметов және А.Жүгінісов қалалық мәслихат депутаттымен бірге 2025–2026 жылғы жылыту маусымына дайындық жұмыстарының орындалуын бақылау мақсатында «Kazakhmys Distribution» ЖШС-нің жылу энергетика кәсіпорнында кезекті рет болды. Кәсіпорын директоры С.М. Қожабаев жөндеу жұмыстарының көлемімен және орындалу барысымен таныстырды. Қазіргі уақытта №1 және №4 қазандықтарда мердігер ұйымдар тарапынан күрделі жөндеу жұмыстары жүргізілуде. Сонымен қатар, №2 және №3 қазандықтарда кәсіпорынның өз күшімен ағымдағы жөндеу жұмыстары жалғасуда. Барлық қазандықтарға жылу оқшаулау жүргізіліп, газтазарту құрылғыларына, қосалқы жабдықтарға, сорғы паркіне және құбырларға жөндеу жұмыстары жүргізілуде.
Көмір түсіру технологиясын жаңғырту аясында атмосфераға тарайтын шаңды азайту үшін арнайы желі орнатылып, эмульгаторлар қолдану жоспарлануда.
2025 жылғы 30 шілдедегі жағдай бойынша, жөндеу жұмыстарының жалпы орындалу көлемі 62%-ды құрайды. Көмір қоры 80 мың тоннаны құрап, бұл көрсеткіш жыл соңына дейінгі тұрақты жұмысқа жеткілікті деп бағаланды. Мониторингтік топ жұмыс кестесінің сақталуына және орындалатын жұмыстың сапасына ерекше назар аударып, бақылауды жалғастырады.

Фото

Previous Next