30.07.2025 жылы Алматы облысы Қоғамдық кеңесі Қонаев қаласында орналасқан Балаларды қолдау орталығында болып қайттық.

30.07.2025 жылы Алматы облысы Қоғамдық кеңесі Қонаев қаласында орналасқан Балаларды қолдау орталығында болып қайттық. 
Ұлттық құрылтайда қолдау тапқан «Балалар кітапханасы» мен «Біртұтас тәрбие» бастамалары аясында қоғамдық шарамызды өткіздік. Әр балаға жас ерекешелігіне сай келетін кітаптарды және ұлттық руханияттан хабар беретін футболкаларды сыйға тарттық. 
Жарнамалағандай болмайын, бірақ Исмаил деген азаматтың «Бес арыс», «Үш бәйтерек», «Жеті қазына», «XVIII қара сөз», «Күлімде», «Әлейхан Бөкейханов», «Киіз үй», «Шаңырақ» деген тақырыптарға принт жасаған футболкалары сапа жағынан да, мазмұн жағынан риза етті. 
«Балалар кітапханасы» аясында мектеп жасындағы балаларға 1847 кітап іріктеліп алынғанын білесіздер. Біз сол тізім бойынша таңдадық және тізімді анықтаудың критериін басшылыққа алдық. Кітаптардың  60% - қазақ,  30% - шетел және 10% - орыс жазушыларының туындыларынан жасақталды. 
Баллардың кітап оқуға деген қызығушылығы өте жоғары!
Әрқайсымен сөйлесіп, қызығушылығын тыңдадық. 
Мәселен, Алтынай – Мұқағали өлеңдерін жатқа айтады екен. Ақынның «Аманат» аталатын жинағын көргенде қуанып кетті. Келесі жолы шығармаларының 4 томдық толық жинағын апарамыз деп уәде бердік. 
Николайды грек мифологиясы қызықтырады екен. Екеуміз Зевс бастаған құдайлар пантеонын біраз талқылап тастадық. Одан бөлек космос және биология тақырыптарын ұнатамын деді. 
Джек Воробей, Гарри Поттер, тіпті мектепте өзін ұстаудың мінез-құлқына қатысты кітаптарды да әкелуімізді айтқандар болды. 
Біз "Ұлттық 100 кітапқа" қандай туындылар енуі қажет деп сұрағанымызда көпшілігі бір ауыздан «Менің атым Қожаны» атады. Тіпті Денис деген жігіт өзіне тиген басқа кітапты соған ауыстырғысы келді. Абырой болғанда екі дана алып барған едік, біреуін үстіне қосып бердік. 
Орталықтың енді ғана ашылған өз кітап залы бар екен. Соған бірінші болып 60 кітапты тапсырдық. Мұндағы кітап қорын толтырып тұруды Алматы облысының Қоғамдық кеңесі тікелей миссия етіп аламыз. Бұл туралы жазып, өздеріңізді хабардар етіп отырамыз. 
Сосын сол ғимараттың ішінде орналасқан спортзалда волейбол ойнадық. 21/19 есеппен менің командам жеңіліп қалды. Домбыра тартатын үйірме, қолдан түйін түйетін шеберхана, аспаздық секілді замануи жабдықталған бөлмелерді де көзбен көрдік. 
Ең басты мәселе әрбір адам, соның ішінде бала атаулы өзін біртұтас қоғамның мүшесі ретінде шынайы сезінуі тиіс. Кездесуге барған әріптестеріміз де үлкен әсер алды. Қасыма келіп отырған 4 жасар Айсұлтаннан өскенде кім боласың десем әуелде тілін дым түсінбедім. Сосын қасындағы балалар «жөндеуші» деп аударып берді. Жұмысшы мамандықты таза қазақша айтқанына аузымды ашып қалыппын. Ауылда өссек те бірінші рет естуім болды негізі ).
Біраз айтатын ойлар да келді, бұйыртса алдағы уақытта бөлісе жатармыз.

Фото

Previous Next