Кезектен тыс қоғамдық кеңес отырысы өткізілді.

         Зайсан аудандық Қоғамдық кеңесінің қарауына ұсынылған нормативтік құқықтық актілерінің жобаларының қарау мерзімін сақтау мақсатында 2025 жылдың 20 маусымында Қоғамдық кеңестің кезектен тыс отырысы өткізілді. Сонымен бірге отырыста әртүрлі мәселелер де қаралды. 
Отырыста «Зайсан аудандық мәслихатының 2024 жылғы 25 желтоқсандағы « 2025-2027 жылдарға арналған Зайсан ауданының бюджеті туралы № 30/2-VIII шешіміне өзгерістер енгізу туралы» аудандық мәслихаттың шешім жобасы туралы аудандық экономика және қаржы бөлімінің басшысы Ғ.Кожекенованың хабарламасы тыңдалды. Шешім жобасындағы « Бір қабатты Шығыс» бағдарламасын жалғастыруға 1 млрд 689 млн теңге, Біржан ауылындағы көпірді жөндеуге 26 млн 271мың тенге бөлінуін қоғамдық кеңес мүшелері аудан әкімінің атқарып жатқан оң жұмыстарының бірі ретінде атап өтті. Сонымен бірге 124 млн 926 мың теңге жоспардан артық орындалған ауданның өз кірісінің және ағымдағы бюджетте жоспарланған бюджет шығындарын қысқарту арқылы 37 млн 448 мың тенгенің трансферт арқылы облыстық бюджетке алынуын да қоғамдық кеңес мүшелері түсіністікпен мақұлдады.
«Зайсан ауданы әкімдігінің 2022 жылғы 2 тамыздағы №453 «Зайсан ауданының аумағындағы стационарлық емес сауда обьектілерін орналастыру орындарын айқындау және бекіту туралы» қаулысының күшін жою туралы аудан әкімдігінің қаулысының жобасы туралы аудандық кәсіпкерлік және ауылшаруашылығы бөлімінің басшысы Қ.Каримовтың хабарламасы тыңдалды. Қоғамдық кеңес мүшелері аталған қаулы жобасын қарап талқылай келе, әкімдік қаулысының нормативтік құқықтық акт ретінде қолданыста болғандықтан оны жоюдың кәсіпкерлер үшін құқықтық салдары болуы мүмкіндігін ескере келіп, әкімдік қаулысының нақты орындалуына, Зайсан қаласы ішіндегі стационарлық емес сауда обьектілеріне мониторинг жасауды, қаулыны күшін жоймай , қаулыға қажетті өзгерістер мен толықтырулар енгізуді аудандық кәсіпкерлік және ауылшаруашылығы бөлімінің басшысы Қ.Каримовке ұсынды.
«Зайсан ауданы бойынша конкурска ұсынылатын ауылшаруашылығы мақсатындағы жер учаскелерінің тізімі туралы» Зайсан аудандық жер қатынастар бөлімінің басшысының м.а Б.Ермекованың хабарламасы тыңдалды. Тізімде ұсынылған барлық жер учаскелеріне ауылдық округтердегі жергілікті қоғамдастық жиналыстарының оң қорытындыларын ескере отырып аудандық қоғамдық кеңес мүшелері тізімді мақұлдады.
Отырыста аудандық қоғамдық кеңестің «Сыбайлас жемқорлыққа қарсы іс қимыл туралы» комиссиясының ұсынысы бойынша «Зайсан ауданында ауылшаруашылық құрылымдарына мемлекет тарапынан берілетін жеңілдіктер мен көмектер туралы» мәселе қаралып, аудандық кәсіпкерлік және ауылшаруашылығы бөлімінің басшысы Қ.Каримовтың хабарламасы тыңдалды. Қоғамдық кеңес мүшелері аудандағы ауылшаруашылық құрылымдарын мемлекет тарапынан берілетін жеңілдіктер мен көмектерді мүмкіндігінше алып жатқандығын атап өтті. Дегенмен мемлекет тарапынан берілетін жеңілдіктер мен көмектер туралы аудандағы ауылшаруашылық құрылымдарын ақпараттандыру жеткіліксіз екендігі, бөлім және қала, ауыл әкімдері тарапынан ауылшарушылық құрылымдарына осы жеңілдіктер мен көмектерді алуға жетекшілік жасалмай отырғандығы, соның нәтижесінде осы жеңілдіктер мен көмектерді алып отырған ауылшаруашылық құрылымдарының саны аз екендігі айтылды. Мысалы арзандатылған дизель отынын ауданда тек бір шаруа қожалығы алғаны тиісті ұйымдастыру жұмыстарының жеткілікті жүргізілмегендігін көрсетіп отыр. Сондай-ақ осы жеңілдіктер мен көмектерді алған ауылшаруашылық құрылымдарының жұмыс нәтижесінің қаншалықты артқанына, ауылшаруашылық өнімдерінің бағасының төмендеуіне қосқан үлесіне сараптама жасалып, ақпараттандырылмайтыны айтылды. Қоғамдық кеңес мүшесі М.Бошақов «Ауыл шаруашылығы құрылымдарының қыстақтары мен фермаларына электр желісін тарту» бағыты бойынша берілетін жеңілдіктерді ауданның ауылшаруашылық құрылымдары пайдалана алмай отырғандығын айтып, келешекте осы бағытта жұмысты жақсартуды ұсынды. Қоғамдық кеңес мүшелері ауданда комбайн мәселесі шешілмегендіктен егін егу көлемі азайып кеткендігін, осы мәселені шешу жолдарын сөз жүзінде емес, іс жүзінде қарастыруды, күн тәртібіндегі ірі проблемалық мәселе ретінде қарап шешуді ұсынды.
Қоғамдық кеңес отырысы бөлім басшысы Қ.Каримовқа ауылшаруашылығы құрылымдарына берілетін жеңілдіктер мен көмектердің берілуіне жариялылық пен ашықтықты, нәтижелікті қамтамасыз етуді ұсынды. Осы мәселе жыл қорытындысымен алқа отырысында қайта қаралатыны ескертілді.
Қоғамдық кеңес отырысы аудандағы күнделікті халық тұтынатын тауарлардың бағасын бақылау жөніндегі мобилдік комиссияның құрамына қоғамдық кеңес мүшелері М.Бошақов пен М.Боранбаевты ұсынды.

Фото

Previous Next