Маңызды жаналық

v Көкшетау тұрғындарына маңызды жаңалық! Қоғамдық кеңес проблемалық күл үйіндісін тексеруде!
Бүгін, 2025 жылғы 30 шілдеде, Ақмола облысы Қоғамдық кеңесінің бастамасымен Көкшетаудағы күл үйіндісінің жағдайын тексеру үшін арнайы комиссия құрылды. Оның құрамына:
 * Ақжол Қылышбаев (Көкшетау қаласы әкімінің орынбасары)
 * Руслан Мәкішев («Көкшетау Жылу» ШЖҚ МКК басшысы)
 * Рүстем Қожагелдинов («Көкшетау қаласының Құрылыс бөлімі» ММ басшысы)
 * Жандос Ахметкаримов («ECONESS» ЖШС мердігерлік ұйымының техникалық директоры)
 * Сондай-ақ Қоғамдық кеңес мүшелері: Қабдуали Құлышев (Төраға), Серік Кәкенов (төраға орынбасары), Хасенов Е.М., Плюснин И.Г., Ахетова А.К., Мұхамедрахимова А.Х. кірді.
Комиссия жұмысын бастап кетті, ең алдымен қала тұрғындарын қатты алаңдататын күл үйіндісіне барды.
Еске сала кетейік, осы жылдың 23 мамырында облыстық Қоғамдық кеңес Ақмола облысының әкімі М.М. Ахметжановтың атына ұсыныс жасап, көмір шаңы қазандықтары мен күл үйіндісі ыдысының жай-күйі мен бақылау мәселесін көтерген болатын.
Қазіргі уақытта РК-2 кәсіпорнында КВТК-100-150 үлгісіндегі үш көмір шаңы қазандығы орнатылған және жұмыс істеп тұр, олардан шығатын қалдықтар пульпа түрінде екі пульпа құбыры арқылы күл үйіндісінің ыдысына тасымалданады. Бұл ретте, күл үйіндісінде шаңдануды болдырмау үшін су экраны қолданылады.
Өкінішке орай, қоғамдық бақылау барысында геомембрананың опырылғаны анықталды! Себебі, үйіндінің ығысуы және бастапқыда 90 тоннаға дейін көзделген салмақты ұстай алмауы болды. Әлі қыста мониторингтік топ бөгеттің еңіс бұрышының сәйкес келмеуін және беткейлерге кері толтырудың жоқтығын атап өткен еді.
Бұл күл үйіндісі – стратегиялық объектілерге теңестірілген күрделі гидротехникалық құрылыс. Сондықтан оны салу кезінде барлық технологиялар аса мұқият сақталуы тиіс. Қазір бұл мәселе бойынша авторлық және техникалық қадағалаулар арқылы инженерлік-техникалық зерттеулер жүргізілуде.
Қоғамдық кеңес мүшелері жылыту маусымы басталғанға дейін жөндеу жұмыстарын аяқтауға үлгере ме деп қатты алаңдаулы, себебі күл үйіндісінің опырылуы үлкен экологиялық апатқа әкелуі мүмкін! Бұл Станционный кентіне (2800 м), «Бірлік» ықшам ауданына (3488 м), Застанционный кентіне (4700 м) жақын жерлерде ластаушы заттардың қоршаған ортаға төгілуіне алып келуі ықтимал.
Дегенмен, техникалық директор Жандос Ахметкаримовтың айтуынша, техникалық шешім табылған! Қазіргі уақытта барлық қажетті құжаттар ресімделіп, техникалық хаттамаларға қол қойылуда. Демонтаж жұмыстары авторлық қадағалаумен есептеулер келісілгеннен кейін он күн ішінде аяқталады деп жоспарлануда. Жөндеу жұмыстары жылыту маусымы басталғанға дейін аяқталуы тиіс!
Оқиғалардың дамуын бақылап, сіздерді хабардар етіп отырамыз!

Фото

Previous Next