Отанын қорғауға барған әрбір сарбаздың қауіпсіздігі қатаң бақылауда болуы керек

---

Тәуелсіздігімізге 30 жыл болса да бейбіт күнде Отан алдындағы борышын өтеуге кетіп, табытпен қайтқан, ақыл-есін жоғалтып оралған, мүгедек болған солдаттар туралы ақпараттар легі толастар емес. Ең кемі армияға барған әрбір азамат психикалық травма алып келеді. Қазақстан армиясы неге «джунгли заңымен» өмір сүреді? Армиядағы әлімжеттік қашан жойылады?! Әскердегі сарбаз неге үйінен ақша сұратады?!
Қазіргі Қазақстан армиясы үрей мен қорқыныштың синониміндей. Армияға барғысы, армияға жібергісі келмейді. Себебі қаруластарынан өлімші болып таяқ жейтінін білетін болашақ сарбаз әскерге баруға құлықсыз.
Жамбыл облысы, Қордай ауданындағы №30212 әскери бөлімде орын алған Әлібек Қалбайдың өліміне күдікті ретінде қамауға алынған Айболат Аманжоловтың Атырау облыстық әскери комиссариатының алдына әділдік іздеп жиналған ата-анасы және туысқандарымен Атырау облыстық қоғамдық кеңестің мүшелері Нұрайнаш Камалова мен Дарья Олжағалиева барып кездесті. Күдікті ретінде қамауға алынған Айболат Аманжоловтың кінәлі  екеніне туыстары сенбейді..
Олардың айтуынша, 31 мамыр күні Айболат Аманжолов уақытша ұстау изоляторынан Алматы қаласының тергеу абақтысына ауыстырылған, және бұл туралы А.Аманжоловтың адвокаты Сержан Пралиевке заңға сәйкесінше тергеуші ескертудің орнына, 1 маусым күні уақытша ұстау изоляторының басшысынан білгендігін айтады.
Басында оқиға орны мен сот-медициналық сараптаманың нәтижесінде марқұм Ә.Қалбайдың денесінде соққы мен гематома анықталмады деп ресми хабарланған, содан кейін бір ғана Петропавлдық сарбаздың куәлігімен А.Аманжолов кінәлі деп қамауға алынған.
А.Аманжоловтың туыстарының айтуынша 3 күдікті бар екені айтылғанмен, екі күдіктінің аты-жөні әлі аталмаған.
     Марқұм Ә.Қалбайды «айжамал» деп атап мазақтаған әскери Ә.Д-қа да қатысты тергеу жұмыстары жүрігізлсін,-дейді А.Аманжоловтың туыстары.
Жас сарбаздар Айболат Аманжолов пен марқұм Әлібек Қалбай екеуі де Батыс өңірінен болғандықтан достық қарым-қатынаста болған.
Айболаттың өзі әлжуаз денелі, қатты соққы жасауы мүмкін емес,-дейді туыстары.
       Айболаттың туыстары ақкөңіл, мейірімді бала екенін айтады.
Мектепте сабақ берген ұстаздары Айболаттың мұндай қатігездікке баруы мүмкін емес деп, әділ тергеуді талап етіп, бұған дейін митинг ұйымдастырып,  Жамбыл облысы, Қордай ауданындағы №30212 әскери бөлімде орын алған Әлібек Қалбайдың өлімін жан-жақты, әділетті түрде тергеуді талап еткен болатын.
Қазақстан халқы Қазақстан Республикасы Қорғаныс министрлігінен Қазақстан армиясына қатысты реформалар талап етеді.
Отанын қорғауға барған әрбір сарбаздың қауіпсізідігі қатаң бақылауда болуы керек!
Әскердегі әр солдаттың денсаулығы мен өміріне әскери бөлімнің басшысы басымен жауап беруі тиіс!
Денсаулығы жарамаса да армияға жарамды деп қорытынды шығарған дәрігер жауапқа тартылуы керек!
Жарғыға сәйкес келмейтін жағдайлар орын алғанда сол жағдайдың күрделілігіне қарай әскери бөлімнің командирінің де жазасы қатты  болуы тиіс.
Бейбіт кезде әлімжеттіктен немесе жұмбақ жағдайда солдат өлімі болған әскери бөлімнің командирінің жазасы халық жауының жазасындай, мемлекетке сатқындық жасау жазасымен бірдей болуы керек! Себебі ол мемлекетін қорғауға барған азаматты ұрып өлтіруге жол берді.
«Ауруын жасырған өледі» дейді қазақта. Бүгінгі күні Қазақстан армиясының обасына айналған «дедовщинаны» жою үшін, біз қоғам болып, ол туралы ашық айтып, Мемлекет басшысына талаптар қоюға тиіспіз.
Сонда ғана Қазақстан армиясының беделі артып, жастар құлшына барар еді.
Ел егемендігінің тірегі–ол оның армиясы.
Тәуелсіз елімізде патриот жастардан құралған күшті, қуатты армиямыз мемлекетіміздің бейбітшілігі мен тұрақтылығын нығайтуы керек.

Нұрайнаш Камалова,  облыстық Қоғамдық кеңесінің  мүшесі