Қазкеңес жаңалықтары
KazKENES жаңалықтарыИндер аудандық Қоғамдық кеңестің жаңа құрамының алғашқы отырысы өтті
Қазақстан Республикасының «Қоғамдық кеңестер туралы» Заңының 9-бабы 7-тармағына сәйкес Қоғамдық кеңесті қалыптастыру жөніндегі Жұмыс тобы Қоғамдық кеңес туралы үлгілік ереже негізінде конкурс өткізіп, Индер аудандық Қоғамдық кеңесінің IV – құрамын және Қоғамдық кеңеске кандидаттардың резервтік тізімін қалыптастырды.
Бүгін кеңестің алғашқы отырысы өтіп, оған аудан әкімі С.Нсанбаев, аудандық мәслихат төрағасы А.Рамазанов, аудан әкімінің орынбасарлары және кеңестің бұрынғы және жаңа құрамының мүшелері қатысты.
Күн тәртібінде Индер аудандық Қоғамдық кеңесінің IV – құрамының төрағасын сайлау, төралқа мүшелерін сайлау, қызмет бағыттары бойынша комиссиялар құрамын және комиссия төрағаларын, Индер аудандық Қоғамдық кеңесі туралы Ережені бекіту, жаңа құрамның жұмыс жоспарын бекіту туралы 5 мәселе қаралды.
Жиында алдымен Кеңестің III құрамының өкілеттік мерзімі аяқталуына орай, аудан әкімі С.Нсанбаев бұрынғы кеңес мүшелеріне қоғамдық өмірге белсене араласып, ауданның әлеуметтік-экономикалық дамуына қосқан елеулі үлесі үшін шынайы алғыс білдірді. Кеңес мүшелерінің тұрғындар мен билік арасындағы ашық диалог орнатуда, өзекті мәселелерді көтеріп, ұсыныстар айтуда белсенділік танытқанын ерекше атап өтті. Сонымен қатар, кеңес жұмысының халықтың мұң-мұқтажын жеткізуде және қоғамдық бақылауды қамтамасыз етуде маңыздылығы зор екенін айтты.
Кеңестің III құрамының мүшелеріне облыстық және аудандық мәслихаттың, сондай-ақ аудан әкімінің Алғыс хаттарын табыстады.
Индер аудандық Қоғамдық кеңесінің IV-құрамының мүшелері таныстырылып, қызметтік куәліктер тапсырылды.
Сондай-ақ кеңес төрағасын сайлау рәсімі өтіп, мүшелер бірауыздан Қоғамдық кеңес төрағасына «Аудандық кәсіпкерлер мен жұмыс берушілер» қоғамдық бірлестігінің төрағасы Дауталиев Жамбыл Меңдіғалиұлын сайлады.
Аудандық мәслихат төрағасы А.Рамазанов — Қоғамдық кеңестің міндеттері мен маңыздылығына тоқталып өтті. Кеңестің негізгі мақсаты — азаматтардың мемлекеттік шешімдерді қабылдау процесіне қатысуын қамтамасыз ету, қоғамдық бақылау жүргізу және халық пен билік арасындағы ашық байланыс орнату екенін атап өтті. Сонымен қатар, кеңес мүшелерінің белсенділігі мен бастамашылдығы жергілікті басқару сапасын арттыруға оң әсер ететінін жеткізді.
Келесі күн тәртібіне сәйкес кеңестің төралқа құрамы бекітілді, қызмет бағыттары бойынша комиссиялар құрылып, комиссия төрағалары мен мүшелері бекітіліп, Жұмысшы тобы әзірлеген Индер аудандық Қоғамдық кеңесі туралы Ереженің жобасы бекітілді және кеңестің жұмыс жоспары талқыланды.
Фото
