Референдум-Қазақстанның болашағын айқындайды

---

Мемлекет басшысы Қасым-Жомарт Кемелұлы Тоқаев ел билігінің тізгінін өз қолына алысымен, «Халық үніне құлақ асатын  мемлекет «тұжырымдамасын ұсынып, қарапайым адамдарды толғандырған талай көкейтесті  мәселенің оң шешілуіне ұйытқы болып келеді. Бұл мемлекет басшысының өз қызметін Конституциямызда жазылғандай «мемлекеттік биліктің бірден-бір бастауы–халық» деген басты қағидатқа сүйене  атқарып отырғанын айғақтайды.

Президент биылғы  жолдауында  халықтың, қоғамның көкейінде көптен жүрген, әбден пісіп, жетілген саяси мәселелерді шешу жөніндегі бірқатар ұсынысты жариялағаны белгілі. Соған байланысты  белгілі  заңгерлер, қоғам  қайраткерлері енгізілген арнайы жұмыс тобы құрылып, оның отырыстарында Ата Заңның 33 бабына енгізілген өзгерістер мен толықтырулар пысықталды. Конституциялық кеңестің  қарауына жіберіп, күні кеше оның оң қорытындысы  шығарылды.  Енді оны  бұрынғы әдетпен Парламентке жіберіп, бір-екі аптаның ішінде жеделдете қабылдап жіберуге де болар еді.

Бірақ, президент өзі жариялаған Жаңа Қазақстанның һәм Екінші Республиканың негізін қалайтын аса маңызды  Конституциялық  реформаны ат төбеліндей аз топтың емес, бүкіл халықтың талқысына салуды жөн көріп, референдум өткізуді ұсынды. Ата Заңда: «Халық билікті тікелей  республикалық референдум және еркін сайлау арқылы  жүзеге асыруды мемлекеттік органдарға береді, -деп жазылғанын ескерсек, еліміздің тәуелсіздік жылдарында мұндай мүмкіндік  халқымызға  екінші рет берілмекші. Сөйтіп, Конституцияға енгізілетін өзгерістер мен толықтырулардың  бәрі өзара байланысты және бір мақсатты көздейді.                    Атап айтқанда, мынандай үдерістерге   құқықтық негіз қалыптастыруға    арналған:

1. Суперпрезиденттік басқару үлгісінен президенттік   республикаға түбегейлі көшу;
2. Бірқатар билік өкілеттігін қайта бөлу;
3. Парламенттің ролін күшейтіп, мәртебесін арттыру;
4. Елді басқару ісіне халықтың қатысу мүмкіндігін кеңейту
5. Азаматтардың құқықтарын қорғау тәсілдерін жетілдіру.

Ел өміріндегі бұл өзгерістер  сайып келгенде, Конституциялық реформа азаматтардың елді басқару  ісіне қатысу мүмкіндігін арттырады және саяси үдерістерді  шын мәнінде демократияландырады, әрине оны  тиімді  жүзеге  асыру –уақыт  еншісінде. Ел мүддесі, халық игілігі жолында жасалған  бұл қадам-Жаңа Қазақстанға апарар жол екені анық.

Билік пен азаматтық қоғам  арасындағы байланысты нығайтуда  Қоғамдық кеңестің орны ерекше. Өңірдегі қоғамдық кеңестер өкілеттігінің аяқталуына байланысты  Атырау облыстық қоғамдық кеңес құрамы да қайта жасақталып, жұмысын бастап кетті. Қоғамдық кеңестің құрамы 93,5 пайызға жаңартылып, 80 пайызы азаматтық қоғам өкілдері болып қалыптасты. Қоғамдық кеңес құрамына сайланған қоғам белсенділері, үкіметтік емес ұйым мүшелері, саяси партиялар өкілдері өңірдің өзекті мәселелерін талдап, халықтың пікірін билікке жеткізуде және кері байланыс орнатуда жемісті еңбек етіп, «Халық үніне құлақ асатын мемлекет» тұжырымдамасын бекітуге атсалысуда.

Қоғамдық кеңес жанынан 5 салалық комиссия құрылып, әрбір комиссия өз саласы бойынша проблемалық мәселелерге талдау жасап, атқарушы органдарға ұсыныстар беріп келеді.

«Халық қаласа хан  түйесін сояды» демекші облыстық Қоғамдық кеңес мүшелері қоғамның көкейтесті мәселелерін атқарушы билік өкілдеріне  жеткізіп,  олардың  оң  шешілуіне  ықпалын  тигізіп келеді. Шын мәнінде, «қоғамдық пікір» қоғам  дамуының қозғаушы  күші екені айқын сезілуде.

Президентіміз «Алдағы референдум Қазақстанның болашағын айқындайды. Әрбір азаматымыз дауыс беріп, осы тарихи  бетбұрысқа өз үлесін қоса алады»-деп атап көрсетті.

Ендеше, Атырау облысы Қоғамдық кеңесі де ел болашағы, жарқын өзгерістер үшін Мемлекет басшысының бастамаларына қолдау білдіріп, референдумға қатысуға және халық арасында түсінік жұмыстарын жүргізуде белсенділік танытады деп сенім білдіремін.

Жаһандану заманында тәуелсіздігіміздің тұғырын нығайту үшін ең қажеттісі –ел бірлігі, ішкі тұтастығымыз. Бүгінгі тарихи өзгерістер кезеңінде халықтың әл–ауқатын арттыруға арналған барлық бастамаларды қолдап, өз үлесін қосу әрқайсымыздың міндетіміз.

Жаңа  Қазақстанның жаңа тарихын бірге жазатын, бірге шешім қабылдайтын, бірге талқылайтын сәт келді. Сондықтан референдумға бәріміз бір адамдай белсенді түрде қатысып, азаматтық позициямызды, ой пікірімізді бідіру, болашақ алдында жауапкершілік сезіну- басты борышымыз.

Ел экономикасына сүбелі үлес қосып отырған мұнайлы Атырау өңірі–Ата Заңымызға өзгерістер мен толықтырулар енгізу жөніндегі референдумды толық қолдайтындығын жеткізгім келеді. Біз Жаңа Қазақстанды бірге құруға атсалысамыз!!!

 

Атырау облыстық Қоғамдық кеңесінің  төрағасы  Мақсым Ізбасов